د افغانستان او پاکستان ترمنځ د تورخم لاره چې د جمعې په شپه تړل شوې، تراوسه تړلې پرته ده، دواړو خواو ته په لويه شمېره کې مسافر او ورسره مال وړونکي ګاډي ایسار شوي دي. په پوله ګېر خلک وايي، دواړه هيوادونه یې خپلمنځني ستونزه هواره کړي، د عامو خلکو او سوداګرو مشکلات دې ختم کړي.
پاکستاني چارواکو او افغانستان کې واکمنو طالبانو تراوسه پورې د پولې پرانستو په اړه په رسمي توګه څه نه دي ویلي.
په تورخم پوله پاکستان لوري ته ايسار شوی محمد خان چې د افغانستان د وردګ ولايت اوسېدونکی دی وايي، شپږمه ورځ یې ده په تورخم سره د ملګرو ګېر شوی، دروازې پرانستو په تمه ناست دي چې دروازه به خلاصيږي او دوی به خپل وطن ته ځي.
وي او اې ډیوه سره خبرو کې هغه وويل، داسې ناست دي باران وريږي موسم يخ دی، خلک سخت پرېشانه دي، ځينو مسافرو سره چې ښځې او ماشومان دي، پيسې ورسره نشته، دوی ورله پيسې ټولې کړي او خوراک یې ورله اخستی دی.
هغه وویل، په پوله دواړه خواوې خپلې پوستې جوړوي او زور یې د عامو خلکو او مسافرو نه وځي.
يو افغان ډرايور غېرت الله وايي، په لويه لاره کې ایسار شوي، بار ګاډي یې ولاړ دي، ټايرونو ته یې تاوان رسي، د کشتونو په ګاډو تاوان نور سېوا کیږي.
هغه وويل، دوی د وړاندې نه په لارو کې او په پولو د مشکلاتو سره مخ دي او چې بيا لاره بنده شي ستونزې یې نورې پسې سېوا شي.
هغه زياته کړه، دوی ته دغلته هیڅ اسانتياوې نشته، نه د خوراک څښاک او نه د ناستې ولاړې، د دواړو خواو نه د مشکل حل کولو غوښتنه کوي.
د افغانستان سره سوداګري کوونکی شاجهان خان وايي، کله هم چې تورخم بند شي تر ټولو زيات مالي تاوان دوی ته رسي.
وي او اې ډيوه سره خبرو کې هغه وويل، د پاکستان لوري افغانستان ته د مېوو کینو او سبزیانو الوګانو لېږلو سيزن دی، دوی ته مېوې او سبزيانې خرابې شوې، ډېرې ګاډي بيرته ستانه شو، دوی د لوی تاوان سره مخ کيږي.
نوموړي وويل، د ده په اندازه دواړو غاړو ته مال وړونکي او ځينې پکې د سامانو ډک د دوو زرو پورې ګاډي ایسار شوي دي.
د تورخم دروازه د 21مې فرورۍ د شپې 11 بجو راهسې وروسته له هغې تړل شوې چې افغان طالبانو خپلې غاړې ته ودانۍ يا تاسيسات کول.
سرچينې وايي، په تېرو څو ورځو کې چې دروازه بنده ده، طالبانو خپل لوري او پاکستاني چارواکو خپل لوري ته ودانۍ او نور کارونه ترسره کړي دي.
په پوله موجود يو چارواکي د نوم نه ښکاره کولو په شرط وي او اې ډیوه ته ويلي، ښیې دروازه درې، څلور ورځې نوره هم بنده پاتې شي، خو د نور څه ويلو نه ډډه وکړه.
د ګل، دوشنبې په ورځ په پوله د پاکستاني چارواکو او طالبانو ترمنځ د خبرو کېدو ویل شوي، چې دواړو خواو ليدلي او د پولې د شخړې په سر یې بحث کړی، خو تراوسه یې کومه نتيجه نه ده ورکړې.
Forum