د امریکې د بهرنیو چارو وزیر مارکو روبیو د اوکراین د صدر ولودیمیر زیلنسکي څخه غوښتنه کړې هغه باید په اوول افس کې په رامنځته شوي تاو تریخوالي بښنه وغواړي.
امریکایي نشریاتي ادارې سي این این سره خبرو کې مارکو روبیو ویلي "صدر زیلنسکي ته پکار ده چې زمونږ په وخت ضایع کولو اؤ په دغسې طریقه د غونډې په ختمولو بښنه وغواړي"
د جمعې په ورځ د امریکې خارجه وزیر مارکو روبیو هم هغه مهال په اوول افس کې د مرستیال صدر جی ډي وینس تر څنګ ناست ؤ کله چې د صدر ټرمپ، مرستیال صدر اؤ د اوکراین د صدر تر منځ د اوکراین په شخړه خپلو کې سختې خبرې اوښتې وې.
د دریو واړو مشرانو تر منځ له تکرار وروسته د امریکې اؤ اوکراین تر منځ د معدنیاتو به اړه احتمالي تړون باندې لاسلیکونه هم نه وؤ شوي اؤ صدر زیلنسکي همدغسې له سپینې ماڼۍ وتلی ؤ .
په دغه موقعه له خبرو ګرمېدو وروسته د صدر ټرمپ اؤ زیلنسکي تر منځ ټاکل شوی ګډ مطبوعاتي کانفرنس هم په نیمه کې پاتې شوی ؤ.
د امریکې د بهرنیو چارو وزیر پوښتنه راولاړه کړه چې اوس به کتل دا وي چې ایا د اوکراین صدر د دریوؤ کلونو راهسې د روانې جګړې ختمولو ته سنجیده هم دی اؤ که نه ؟
د مارکو روبیو وینا وه په ظاهره خو داسې ښکاري چې صدر زیلنسکي د امن تړون نه غواړي ، هسې خو هغه وایي چې همداسې غواړي خو ښکاري نه چې هغه داسې غواړي.
هغه ویل دا صورتحال د امن د ټینګښت لپاره په هڅو د بوخت هر شخص لپاره د مایوسۍ وړ دی.
تېره ورځ په اوول افس کې د رامنځته شوې لفظي شخړې په مهال صدر ټرمپ زیلنسکي ته ویلي وؤ چې هغه سره له جګړې ختمولو پرته بله هیڅ لاره نه شته ، اوکریان دې د روس سره تړون وکړي ګنې موږ به ترې ځان پشا کړو.
د صدر ټرمپ وینا وه " ته د دریمې نړیوالې جګړې خطره په سر اخلې،ستا پوځيان وژل کیږي اؤ تا سره هیڅ اپشنز نشته اؤ نه هم د خپلې خوښې د پرېکړې کولو په پوزیشن کې یې "
په دې د اوکراین صدر ویلي وؤ چې د روس سره هیڅ تړون کول نه غواړي.
د امریکې مرستیال صدر جی ډي وینس په دغه موقعه ویلي وؤ، امریکا د سفارتکارۍ له لارې دا جګړه ختمول غواړي خو د اوکراین صدر د جی ډي وینس په دغه خبره راغبرګه کړه "کومه سفارتکاري ، مونږ په ۲۰۲۹م کې د روسیې سره تړون کړی ؤ خو بیا په کال ۲۰۲۲م کې هغوي پر موږ برید وکړو"
د صدر زلنسکي د صدارتي دفتر مشر اندري یرمک د اوکراین د صدر دفاع کړې ده او وایي صدر زلنسکي یې د هیواد لپاره جګړه کوي او د هر هغه چا لپاره ولاړ دی چې د منصفانه او تلپاتې سولې لپاره ولاړ دی. یرمک پر ایکس لیکلي:
"موږ د هغو کسانو مننه کوو چې له موږ سره ولاړ دي او د هغو کسانو مننه چې پوهیږي اوکراین یواځې [د نړۍ] په نقشه کې یو ټکی نه دی. موږ د امریکې خلکو ته د دوی د ملاتړ لپاره د زړه له تله مننه وایو. دا هغه ورځ را نیزدې کوي چې جګړه به یواځې یو یادداشت وي".
خپله صدر زلنسکي هم له خبري غونډې شاوخوا یوه ګنټه وروسته پر خپل ایکس یو لنډ پوسټ کړی، خو تر دې وړاندې یې امریکې ته د سفر په اړه نور تفصیلي پوسټونه کړي او د نورو ملاقاتونو عکسونه او ویډیوګانې یې هم خپاره کړي دي. زیلنسکي لیکلي:
"امریکې ستا مننه، ستا د ملاتړ مننه، د دې سفر لپاره مننه. صدر ټرمپ، کانګرس او د امریکې خلکو مننه. اوکراین منصفانه او تلپاتې سولې ته اړتیا لري، او د دې لپاره په په سمه توګه کار کوو".
د ګڼ شمېر یورپي هېوادونو مشرانو او چارواکو هم د امریکایي او اوکرایني مشرانو تر منځ تاوجنو خبرو ته غبرګون څرګند کړی او د اوکراین د ملاتړ لپاره یې ږغ پورته کړی دی چې پکې د فرانس، جرمني، فنلېنډ، هالېنډ، ډنمارک، سویډن، لېتویا کروشیا، ایرلېنډ، کېنېډا، د یورپي اتحاد او نورو هېوادونو مشران شامل دي.
د یورپي کمیشن مشرې اورسلا وون ډیرلېن په انګرېزي او اوکرایني ژبو په جلا پوسټونو کې صدر زلنسکي ته ډاډ ورکړی د سولې په تر لاسه کولو کې به یې مرسته او ملاتړ کوي. مېرمن اورسلا لیکلي:
"ستاسو وقار د اوکراین د خلکو زړورتیا ته درناوی کوي. پیاوړئ اوسئ، زړور اوسئ، بې ډاره اوسئ. تاسو هیڅکله یواځې نه یئ، ګران ولسمشر زلنسکي موږ به له تاسو سره د منصفانه او تلپاتې سولې لپاره کار ته دوام ورکړو".
صدر زلنسکي د ګڼ شمېر هغو هېوادونو د مشرانو پوسټونه پر ایکس باندې بیا پوسټ کړي او د هغوی مننه یې کړې ده چې له صدر ټرمپ سره تر لیدو وروسته یې د اوکراین په ملاتړ کړي دي.
(ددې رپورټ ځېنې معلومات د اې ایف پي نه اخستل شوي دي
Forum