څېړنیز رپورټونه ښیي چې د خېبرپښتونخوا په بېلابېلو سيمو کې کارکوونکي ماشومان د جنسي تېري، په کم عمرۍ کې د کار کولو او د کار په وخت د وهلو ټکولو د ستونزو سره مخ دي او له حقونو يې سرغړونې کیږي.
د حکومتي ادارو چارواکي وايي د ماشومانو د حقونو خوندي کولو هڅې روانې دي او په دې لړ کې يو شمېر قوانين جوړ کړی شوي دي.
چارواکي وايي د تېر وخت په پرتله اوس د ماشومانو په ضد کېدونکې بدې پېښې رپورټ کيږي.
د خېبرپښتونخوا د خواريکښو د محکمې چارواکی سعید الرحمان وایي، د ماشومانو نه په کم عمرۍ کې محنت اخستل یوه غټه موضوع ده "او مونږ سره کره شمېرې نه وې، دې د پاره مونږ بيا يوه پروژه پېل کړه د کارکوونکو ماشومانو په هکله سروې وشوه اوس رپورټ راغلو نو مونږ ته پته معلومه شوه چې څومره ماشومان په کومو کومو ځايونو کې لګیا دي او کار کوي".
سعید الرحمان وایي، دا يوازې د مزدورانو د محکمې ذمه واري نه ده په دې کې نورې ادارې هم شته چې هغوئ هم په دې کې برخه لري او زمه واره دي.
د ماشومانو د پاره کارکوونکې غېردولتي ادارې ساحل په خپل يو رپورټ کې ويلي پاکستان کې هره ورځ ۱۱ ماشومان د جنسي زور زياتي ښکار کيږي.
دغه رپورټ زياتوي تر ټولو زياتې پېښې د پنجاب نه او بیا ورپسې د خېبرپښتونخوا نه ۱۲۴ رپورټ شوي دي.
د نفسياتي رنځونو ډاکټرانې وايي د جنسي تيري، ځورونې او نورو پېښو ښکار شوي ماشومان د نفسياتي ناروغيو هم ښکار کېږي.
د نفسياتو ډاکټره عروسه شیراز ډیوه ته وایي،د کارکولو په ځايونو کې چې کوم ماشومان ځورول کيږې نو هغې نه څوک هم انکار نه شي کولئ او دې سره سم ماشومان د بدني زياتي ترڅنګ د نفسياتي ناروغيو هم ښکار کيږي.
"نو مونږ سره چې څومره هم ماشومان راځي او د هرې يوې پېښې هم ښکار شوي وي نو هغه د نفسياتي ستونزو يو لوۍ جنجال نه تېرېږي او په نفسياتي توګه د بې دسته کېدو هم ښکار کېږي".
په پښتونخوا کې وخت په وخت د ماشومانو د حقونو خوندي کولو لپاره قوانین جوړ شوي دي.
د حکومتي ادارو چارواکي وايي د جوړ شوؤ قوانينو په هکله ټولنې ته د پوهې ورکولو مهم پېل شوی او دې سره به د ماشومانو په ضد کېدونکو پېښو کې کمی راشي.
په خېبر پښتونخوا کې د ماشومانو د ښېګړې او ژغورنې دکمېشن مشر اعجاز محمد خان وایي، که مونږ ته اطلاع ترلاسه شي چې يو ماشوم سره ظلم زياتی کېږي او ځورول کېږي نو مونږ کوشش کوؤ چې هغه ماشوم خوندي کړو او قانون په رڼا کې انصاف ورکړو.
ډیوه سره خبرو کې ښاغلی اعجاز وایي " که داسې څه خبره راځي نو زمونږ ۱۱۲۱ هېلپ لاین نمبر دی په هغې هم ټيلفون کېدای شي او زمونږ د ضلعو په کچه دفترونه دي هغې ته هم ټيلفون کېدای شي "
نوموړی وایي دوي ماشومانو سره د زیاتي په هکله شکایتونه حل کوي، ماشومانو ته وړیا قانوني مرسته ورکوي اؤ هڅه یې وي چې د ماشومانو په ضد جرم کوونکي د قانوني سزاګانو سره مخ شي.
ساحل نومې غېردولتي ادارې په خپل کلني رپورټ کې ويلي په 2023 م کال کې په ټول هیواد کې په ماشومانو د تشدد 4213 پېښې رپورټ شوي چې په کې 2021 ماشومان د جنسي تېري ښکار شوي دي.
Forum