د امریکا په سر ښار واشنگټن ډي سي کې د ښځو په نړیواله ورځ یو لاریون شوې چې پکې وتلو ښځينه بشر پالانو برخه اخستې.
په واشنگټن کې د ښځو لاریون ته په وینا کې د بشري حقونو فعالې گلالۍ اسماعيل وویل باید ښځې ځان ته په نرواکه ټولنه کې په خپله ځایونه پیدا کړي. د هغې په خیال حقونو بې د کړاوونو او زیارونو نه شي گټل کیدلې.
هغې وویل دوي دلته ځکه راغونډې شوي چې د خپلو حقونو لپاره غږ پورته کړي.
یوې بلې بشر پالې او لیکوالې ماروي سرمد هم په خپله وینا کې د ښځو څخه په ځانگړي ډول وغوښتل چې که دوي خپل حقونه نه غواړي نو څوک یې په خپله ورته نه ورکوي.
ماروي سرمد وویل دوي د ریاست پاکستان نه غوښتنه کوي چې د ښځو د حقونو تحفظ وکړي.
هغې وي او ای ډیوه ته وویل چې دوي غوښتنه کوي چې په پاکستان دې ېوې میاشتې تنخوا لږ تر لږه 40000 روپۍ کړي او هم دومره باید د ښځو وي.
په واشنگټن کې ددې لاریون تابیا کونکې یوې فعالې زینب مجوکه وویل چې ددې لاریون یو مقصد په پاکستان کې د ښځو سره یو والی ښودل هم دي.
هغې وویل چې ښځې د سړو سره د برابرۍ حق غواړي.
په اتم مارچ د ښځو د حقونو په نړیواله ورځ د پاکستان په گډون د نړۍ په یو شمیر ښارونو کې مظاهرې وشوې.
