په کوزه جنوبي وزیرستان کې دپوځ مشر ایي جي (جنوب) ميجر جنرل هارون حميد د امنیت د ټینګښت په اړه واڼه سیمه کې د ځایي ملکانانو او دیني عالمانو سره جرګه کړې ده اؤ له هغوئ یې غوښتي چې د سولې او امنیت لپاره باید خپل مسوولیت په غوره ډول ترسره کړي.
جرګه کې دسیمې پر روان امنیتي وضعیت او د سولې او امنیت د ټینګښت لپاره د امنیتي ځواکونو او مشرانو پر ګډو هڅو هر اړخیز بحث شوی دی.
دا جرګه په داسې حال کې شوې چې تیره اوونۍ د ضلعې مرکز واڼه کې وسله والو د پولیس په تاڼه بريد کړی و چې پکې يو پوليس عسکر ژوبل شوی ؤ او وسله والو له تاڼې څخه وسله هم وړې وه.
تحریک طالبان پاکستان/ ټي ټي پي ددغه بريد ذمه واري منلې وه.
دضلعي انتظامي مشر ددفتر چارواکي وایي دجرګې په مهال په سیمه کې د پوځ مشر میجر جنرل هارون حمید علاقه کې د امنیت ټینګښت ټینګار وکړو اؤ وي ویل چې د ځایي خلکو سره د مرستې لپاره یو مناسب امنیتي چاپیریال اړین دی.
د پوځي افسرانو ترڅنګ ډپټي کمشنر اشفاق او د ضلعي پولیسو مشر ډي پي او عتیق الله هم په دې جرګه کې موجود و۔
دپوځ ځایي مشر وویل د معدنیاتو د سروی له لارې به د سیمې خلکو ته ګټه ورسیږي او دا ټول هغه وخت ممکن دي چې په سیمه کې بشپړ امن وي.
هغه ویلي مشران دې د سولې او امنیت لپاره خپل مسولیت ترسره کړي ترڅو دسیمې خلکو ته دارمه ژوند اؤ پرمختګ فرصتونه په لاس ورشي.
هغه ویلي چې د 27 دسمبر څخه وروسته به علاقه کې هیڅ ډول د تورو شیشو ګاډي ونه زغمل شي او په دې لړ کې یې له خلکو د همکارۍ غوښتنه کړې ده.
جرګه کې د کوزه جنوبي وزیرستان د بیلا بیلو قامونو ملکانو او د علاقې دیني عالمانو برخه اخستې وه.
دا جرکه وروسته له هغې شوې چې علاقه کې د تیرې یوې میاشتې نه د ناامنۍ په ضد احتجاجي مظاهرې پیل شوي اؤ خلک دامنیت دتامین غوښتنه کوي.
په دغو احتجاجي مظاهرو کې د زرګونو په شمیره کې سیاسي او غیر سیاسي خلک ګډون کوي او د علاقې د امنیت غوښتنه کوي .
د ولسي پاڅون یو غړی او په علاقه کې د عوامي نیشنل ګوند فعال ایاز وزیر وایي دا د دوی نماینده جرګه نه وه .
وي او ای ډیوه سره خبرو کې هغه وویل دوی په وروستیو کې له حکومت نه د احتجاجونو د لارې د امنیت غوښتنه کړې او که دا غوښتنه یې نه منل کیږي بیا د جنورۍ په شپږمه احتجاجي پرلت پېل کوي چې ترمخه به یې د علاقې ټول کاروباري مرکزونه او د افغانستان سره دانګور اډې دتجارتي لارې په ګډون د تګ راتګ ټولې لارې تړل کیږي.
هغه وویل په علاقه کې خلک د سختې بدامنۍ سره مخ دي .
دا په داسې حال کې ده چې په څلورم نومبر په سیمه کې د بدامنۍ پرضد پښتون ژغورنې غورځنګ په اعظم ورسک علاقه کې يوه ولسي غونډه کړې وه.
خو هغه وخت د ضلعي پولیسو مشر عتیق الله وي او اې ډیوه ته ویلي وو د علاقې امنیت په قابو کې دى دغلته د خلکو د تحفظ پاره پولیس او نور امنیتي ځواکونه موجود دي او د ضلعې د نورو سیمو ترڅنګ په اعظم ورسک کې ګشتونه کوي.
د پاکستان پوځ د وړاندې نه د افغانستان پولې ته نزدې جنوبي او شمالي وزیرستان ضلعو کې عملیات کړي او دعوې کوي چې د عملیاتو په پایله کې يې د منظمې ترهګرۍ نوغی ویستی دی خو په يادو علاقو کې بيا هم وخت په وخت د بدامنۍ پېښې کيږي.