په شمالي وزیرستان کې د انتظامیې او د میرانشاه بازار دوکاندارانو تر منځ خبرې کامیابې شوې، او ويل شوي دوکاندارانو سره په دوو اوونيو کې د ورانو شوو دوکانونو د تاوان يا معاوضې د مرستو لړۍ پیل کولو ژمنه شوې ده.
د شمالي وزیرستان میران شاه دوکاندارانو تېره ورځ د احتجاج په توګه ټول بازارونه او مارکیټونه بند کړي او احتجاجي مظاهره یې کړې وه.
د احتجاج یو ګډونوال ملک احسان وویل د دوی د تاوان پېسې حکومت منظورې کړي خو دوی ته نه ورکول کیږي.
د صوبې نګران حکومت د میرانشاه د دوکاندارانو د پاره د اکتوبر په میاشت کې یو نیم ارب روپۍ منظورې کړې دي.
هغه وویل دوی ځکه احتجاجي پرلت پیل کړی او د خپل حق غوښتنه کوي چې دا مرستې دې دوی ته فوري ورکړل شي.
په شمالي وزیرستان کې د پاکستان حکومت په کال 2014م کې د وسله والو پرضد عملیات کړي او دوکانداران وايي عملیاتو په پایله کې یواځې میرانشاه بازار کې 7000 نه زیات دوکانونه وران کړل شوي وو.
تیر په صوبه کې د پاکستان تحریک انصاف حکومت د دوی دا تاوان منلی وو او دوی ته یې د مرستو منظوري ورکړې وه.
یو بل دوکاندار انور حسن وویل د ضرب عضب وروسته د دوی کاروبار په ټپه ودرېدلی، او دوی سره د مرستو ژمنې کیږي خو پوره کیږي نه.
هغه وویل دوکانداري د دوی د روزګار یوازنۍ سرچینه ده خو د ضرب عضب عملیاتو پرمهال له دوی څخه دا د اربونو روپو سرچینه تروړل شوې او د خېر په غوښتو مجبور شوي دي.
انتظامیه وايي احتجاج کوونکو سره د انتظامیې مشر منظور اپریدي چې پکې د پوځ افسران شامل وو د پوځ په مرکز کې یې د دوکاندارانو سره مزاکرات کړي او د دوی غوښتنې منل شوي دي.
د انتظامیې مشر منظور اپریدي دفتر چارواکو وویل د 451 کسانو د مرستو چیکونه تیار کړل شوي او د صوبې د حکومت نه د منظورېدو وروسته به دوی ته دا د مرستو لړۍ پیل شي.
د دوکاندارانو د اتحادیې مشر ثنا الله د خبرو تاييد وکړو او وې ویل دوی سره 4500 دوکانداران دي او دا یو نیم ارب روپۍ مرستې یوازې د 1500 دوکاندارانو د پاره دي.
هغه وویل احتجاج ځنډول شوی او که په دوو اوونيو کې د مرستو دا لړۍ پیل نه شوه دا پرلت به بيا پېلوي.