د پاکستان د ځینو نورو سیاسي ګوندونو غوندې په بلوچستان کې هم ملتپالو ګوندونو او سیاستوالو تور پورې کړی چې د انتخاباتو نتایج بدل کړی شوي دي. د پښتونخوا ملي عوامي ګوند مشر محمود خان اڅکزی وایي که د دوی د کره رایو په بنیاد نتایج وړاندې نه شي احتجاجي تحریک به پیل کړي.
محمود خان اڅکزي د فرورۍ پر نهمه ماښام په کوټه ښار کې یوې خبري غونډې ته وویل،" زموږ ګوند پښتونخوا ملي عوامي پر شپږ ایالتي او درې قامي اسمبلیو زیاتې رایې اخیستې او ګټلې خو د دې پایلو د بدلېدو ھڅې روانې دي، له پرون ماښامه درې ځلې دا پایلې بدلې شوې دي".
ښاغلي اڅکزي وویل،" موږ یوہ حلقه ګټلې او که مو ټولې ګټلې، الیکشن کمیشن دې ھغه ھم ھغسې اعلان کړي، د خېرات او رشوت پارلیمان نه قبلوو او نه دې پارلیمان ته ځو".
محمود خان اڅکزي د 10مې فرورۍ د غرمې تر 12 بجو پورې د انتخاباتو کمیشن ته وخت ورکړ چې د ریښتینو ووټونو په بنیاد کره نتیجې وړاندې کړي، که نه وي وایي له ھغه پس چې دوی څه ډول تحریک شروع کوي د دې فیصله به د ھغه ګوند کوي.
په ننني خبري کانفرنس کې محمود خان اڅکزي د پاکستان د پوځي ادارو پر ځینو ځایي افیسرانو تور پورې کړ چې د پېسو په اخیستلو یې بلوچستان کې ځینې کاندیدان د دوی (پښتونخوا ګوند) او نورو کاندیدانو په مقابله کې د بریالي کولو پلان دی:
"دلته کاندیدان وایي ما پلانکي [پوځي افیسر] ته دوہ کروړہ، څلور کروړہ، لس کروړہ، ان شل کروړہ ورکړې دي، د پاکستان د پوځ مشر او چیف الیکشن کمیشنر څخه خواست کوو د دې پلټنې دي وکړي".
د اڅکزي د دې تورنو په ځواب کې تر اوسه پوځ او نه ھم کوم حکومتي چارواکي او یا ھم الیکشن کمیشن جواب نه دی ویلی.
محمود خان اڅکزي د پاکستان پر الیکشن کمیشن او پوځي ادارو دا تورونه په داسې وخت کې پورې کړي چې په بلوچستان کې زیاترہ قامپاله سیاسي او مذھبي ګوندونه پر احتجاج دي او پر الیکشن کمیشن د نتیجو د بدلولو تورونه پورې کوي.
په بلوچستان کې 51 صوبایي او 16 قامي اسمبلۍ حلقو انتخاب دی۔
د بلوچستان په سر ښار کوټه کې بلوڅ قامپاله ګوندونه بي این پي مینګل، د ډاکټر عبدالمالک بلوڅ ګوند نېشنل پارټۍ، ھزارہ جمھوري ګوند، جمعیت علما اسلام (ف)، پښتونخوا نېشنل عوامي ګوند، تحریک انصاف او ځینې ازاد غړي دا مھال پر احتجاج دي۔
یادو ګوندونو د کوټې ښار په ریډ زون زرغون سړک باندې احتجاجونه پیل کړي او له حکومتي او الیکشن کمیشن څخه د ریښتینو نتیجو د اعلان کولو غوښتنه کوي۔
په ږوب او چمن او د صوبې په ځینې بلوڅي سیمو کې ھم د پایلو پر ضد عوامي نېشنل ګوند، ځایي اتحادونه او ازاد کاندیدان پر احتجاج دي او ځینې لارې یې ھم تړلې شوې دي۔
په کوټه کې پر احتجاج نور سیاسي او مذھبي ګوندونو مشرتابه ھم د پایلو پر ځنډېدو او بدلېدو نیوکې کړې او دا یې د پاکستان د مستقبل لپارہ د تاوان وړ عمل بللی۔
د بلوچستان الیکشن کمیشن نن یو تازہ بیان خپور کړی چې پکې لیکل شوي، "د ناامنۍ او لرې پرتو سیمو له کبله انتخابي پایلې ځنډېدلې دي".
الیکشن کمیش د یوہ سیاسي ګوند او کاندید د تورونو ځواب نه دی ویلی، خو وایي"د درو قامي او 35 صوبایي اسمبلیو پایلې اعلان شوې" خو نور تفصیل یې نه دی ورکړی.
د الیکشن کمیشن د غېر حتمي نتیجو پر اساس دا وخت په بلوچستان کې جمیعت علما اسلام (ف) اووہ، پاکستان پیپلز ګوند شپږ، پاکستان مسلم لیګ (ن) شپږ، باپ یا بلوچستان عوامي پارټۍ دوہ، عوامي نېشنل ګوند دوہ، بي این پي عوامي، ھزارہ ډیموګریټک یو یو صوبایي سیټ او ازاد کاندیدانو څلور سیټونه تر لاسه کري دي.