د پاکستان راتلونکې ټولټاکنې

پېښور هایکورټ د نهم مې د پېښو د پلټنو لپاره د صوبایي حکومت لخوا شوی د قضایي کمیشن جوړولو خواست رد کړی دی.

ډان نیوز د سرچینو له خولې خپل رپورټ کې ویلي چې پېښور هایکورت د صوبایي حکومت له لوري د قضایي کمیشن جوړولو په اړوند ورلېږل شوی لیک د نظر ثانۍ لپاره بېرته صوبایي حکومت ته لېږلی دی.

د پېښور هایکورټ د رجسټرار له لوري صوبایي حکومت ته په لېږل شوې مراسله کې ویل شوي، کوم فورم ته چې حکومت د جوډیشل کمیشن جوړولو خواست کړی هغه ددې مجاز نه دی.

ډاڼ د سرچینو له خولې ویلي ،د هایکورټ لخوا لېږل شوي خط کې ویل شوي چې د صوبایي حکومت له لوري هایکورټ ته شوی خواست د صوبایي حکومت د رولز اف بزنس ۱۹۸۵ څخه سړغړونه ده اؤ په دې صورت کې په یاد درخواست عمل نه شي کیدای.

تېره میاشت د خېبرپښتونخوا حکومت د نهمې مې 2023م د پېښو د پلټنو دپاره د پېښور هايکورټ چيف جسټس اشتیاق ابراهيم ته خط استولی ؤ چې پکې د جوډيشل يا عدالتي کمېشن د لارې د دغو پېښو د پلټنو غوښتنه شوې وه.

د پښتونخوا د صوبې د قانون وزير افتاب عالم هایکورټ ته د خط استولو تاييد کړی ؤ او ويلي یې وؤ د جوډیشل کمیشن جوړولو لپاره هایکورټ ته د خط لیکلو منظوري صوبایي کابينې ورکړې وه.

تېر کال په نهمه مې د غبن په قضیه کې د تحریک انصاف ګوند د مشر او پخواني وزيراعظم عمران خان له نيولو وروسته په دغه ورځ او لسمه مې د تحریک ‏‏انصاف ګوند غړو د ملک په لويو ښارونو کې قهرجنې ‏مظاهرې کړې وې.‏

دغه ډول په راولپنډۍ کې په پوځي مرکز جي اېچ کيو، او لاهور کې د کور کمانډر په کور حملې شوې وې ، اورونه لګول شوي وو، ګاډي یې مات کړي او د ‏‏‏ملک په نورو برخو کې هم سرکاري ودانيو ته د تاوانونو اړولو تورونه پرې لګول شوي وو.‏

د پاکستان په بېلابيلو ښارونو کې د نهمې مې د پېښو مقدمې د تحریک انصاف ګوند د مشرانو او غړو پرضد درج شوې وې.‏

‎ ‎د پاکستان پوځ نهمې مې ته توره ورځ ويلي او په دغه ورځ شوې پېښې یې د مجرمانه پېښو په توګه يادې کړي او غندنه یې کړې ده. ‏

پوځ ویلي، "د نهمې مې د پېښې پلان جوړونکو، سهولت کارو او عملي کوونکو سره به هیڅ جوړ جاړی ونه شي او نه به دوی د ملک د قانون د پښو لاندې ‏‏کولو اجازه ورکړي". ‏

د پاکستان وزیراعظم شهباز شريف هم ويلي، "د نهمې مې په پېښو کې ککړو شرخوښو، د هغو سهولت کاراو راپارونکو سره هيڅ نرمي نه شي کېدی او د ‏‏هغوی دپاره هيڅ معافي نشته".‏

پاکستان تحريک انصاف ګوند د وړاندې نه ويلي، په نهمه مې د ياد ګوند پرضد سازش شوی، او په دغه ورځ د شوو پېښو د پلټنو دپاره دې بې پلوه ازاد عدالتي ‏کمېشن جوړ کړل شي.‏

په پاکستان کې د قامي اؤ صوبایي اسمبلیو په 22 څوکیو د ضمني انتخاباتو عمل سرته رسېدلی چې پکې د غیر حتمي اؤ غیر سرکاري نتیجو له مخې په پنجاب کې مسلم لیګ (ن) اؤ په خېبر پښتونخوا کې سني اتحاد کونسل (پاکستان تحریک انصاف)‌زیاتې څوکۍ ګټلې دي.

د باجوړ د قامي اؤ صوبایي اسمبلۍ دواړه څوکۍ د اتمې فرورۍ د انتخاباتو نه وړاندې د وژل شوي ازاد کاندید ریحان زیب ورور مبارک زیب ګټلي اؤ هغه په دې ټاکنو کې د تحریک انصاف د کاندیدانو په ګډون خپلو ټولو وتلو سیالانو ته ماتې ورکړې ده.

د باجوړ نه د قامي اسمبلۍ په نشست د ترسره شوي الیکشن د غیر حتمي اؤ غیر سرکاري نتیجې له مخې ازاد کاندید مبارک زیب 74 زره اؤ 8 رایې ترلاسه کړي اؤ دغه څوکۍ یې ګټلې ده.

هغه پسې په دویم نمبر د سني اتحاد کونسل ( تحریک انصاف) کاندید ګل ظفر 47 زره اؤ 282 رایې ترلاسه کړي اؤ په دویم نمبر راغلی دی.

په دغه څوکۍ نور هم ډیر مهم امیدواران انتخاباتو ته ولاړ وؤ چې هغې کې د عوامي نشنل ګوند کاندید مولانا خان زیب 1205، پخواني ګورنر شوکت الله خان 20202، د جماعت اسلامي هارو الرشید18416،د مسلم لیګ (ن) کاندید شهاب الدین خان 6411 اؤ د پیپلز ګوند اخوندزاده چټان 4060 رایې اخستې دي.

همدا شان د باجوړ نه د صوبایي اسمبلۍ په څوکۍ هم ازاد کاندید مبارک زیب بریالی شوی دی.

د پی کی 22 په څوکۍ مبارک زیب خان 23386 ووټونه اخستي اؤ دغسې یې د باجوړ تاریخ کې په وړومبي ځل د قامي اؤ صوبایي اسمبلۍ دواړه څوکۍ ګټلې دي.

د پاکستاني رسنیو د رپورټونو له مخې دې ټاکنو کې پاکستان مسلم لیګ(ن) ګوند د پنجاب صوبې نه د قامي اؤ صوبایي اسمبلیو په 12کې نهه 9 څوکۍ ګټلې دي.

د قامي اسمبلۍ په 5 څوکیو کې دوه مسلم لیګ(ن) یوه پاکستان پیپلز پارټۍ اؤ یوه سني اتحاد کونسل ګټلې ده اؤ د باجوړ څوکۍ بیا ازاد کاندید مبارک زیب ګټلې ، هغه له مخکې اعلان کړی چې که کامیاب شي نو خپله څوکۍ به تحریک انصاف ګوند ته ورکوي.

د خېبر پښتونخوا د ډیره اسماعیل خان سیمې نه د قامي اسمبلۍ څوکۍ د تحریک انصاف د ملاتړ نه د برخمن سني اتحاد کونسل کاندید فیصل امین خان ګټلې ده .

فیصل امین خان 66281 رایې ترلاسه کړي اؤ د هغه مقابله کې بیا د پیپلز ګوند کاندید عبدالرشید خان کنډي 21970 رایې اخستې دي،

د خېبر پښتونخوا د کوهاټ سیمې پی کی 91 د صوبایي اسمبلۍ څوکۍ د سني اتحاد کونسل کاندید داود شاه په 22 زره اؤ 193 رایو ترلاسه کولو ګټلې ده.

هغه پسې په دویم نمبر زیاتې رایې ازاد امیدوار امتیاز شاهد ترلاسه کړي چې شمېره یې 11زره اؤ 722 ښودل شوې ده.

د بلوچستان په خضدار کې د صوبایي اسمبلۍ پي بي۔20 څوکۍ باندې د بلوچستان نیشنل پارټۍ کاندید میر جهانزیب مینګل 30زره اؤ 455 رایې اخستې اؤ کامیاب شوی دی

په دغه څوکۍ ازاد کاندید میر شفیق مینګل بیا 14زره اؤ 311 رایې ترلاسه کړي دي.

د بلوچستان د قلعه عبدالله نه د صوبایي اسمبلۍ په څوکۍ پي بي۔50 د پښتونخوا ملي عوامي ګوند کاندید میرویس خان اڅکزئ 43زره اؤ 737 رایې اخستي اؤ واضحه بریالیتوب ورته ترلاسه دی د هغه مقابله کې بیا د عوامي نیشنل ګوند کاندید زمرک خان اڅکزي 14 زره اؤ401 رایې ترلاسه کړي اؤ په دویم نمبر راغلی دی.

د الیکشن په موقعه په زیاتره هغو ضلعو کې د موبایل فون اؤ انټرنیټ خدمات تړل شوي وؤ چرته چې ضمني انتخابات کېدل.

په اتمه فرورۍ ګرد هیواد کې د ترسره شوؤ عامو انتخاباتو په مهال هم پاکستان کې د موبایل فون اؤ انټرنیټ خدمات تړل شوي وؤ چې په هغې وروسته بیا د پاکستان بیلابیلو سیاسي ګوندونو اؤ نړیوالو تنظیمونو کلکې نیوکې کړې وې اؤ تور یې لګولی ؤ چې دا کار انتخاباتو کې د ټګۍ لپاره شوی ؤ.

د پاکستان الیکشن کمیشن انتخاباتو کې د ټګۍ تورونه په کلکه رد کړي وؤ