کابل کې دپاکستان سفارتخانې خپله دکونسلي خدماتو څانګه دیوې اوونۍ دپاره تړلې ده اؤ وایي دا ګام یې دغه هیواد کې د کرونا وبا سیوا کیدو له امله اخستی دی.
په کابل کې د پاکستان سفارت په خبر پاڼه کې ویلي، د کرونا وایرس د مخنیوي لپاره غواړي نن یکشنبه د خپل سفارت قونسلګرۍ څانګه د یوې اوونۍ دپاره وتړي.
د پاکستان سفارت په خپله فیسبوک پاڼه لیکلي چې، د ویزو ورکولو چارې به یې په انلاین بڼه روانې وي.
له دې دوه ورځې مخکې په کابل کې د امریکا سفارت هم په یوه اعلامیه کې ویلي وؤ چې دکرونا وایرس د مخنیوي په موخه به د یکشنبې په ورځ دخپل سفارت دکونسلي خدماتو څانګه بنده کړي.
دا په داسې حال کې ده چې په افغانستان کې د کرونا وایرس دریمه څپه په چټکۍ روانه ده او ورځ تر بلې د کرونا ددې وایرس په مثبتو پیښو کې زیاتولی راځي.
د افغانستان حکومت د کرونا وایرس د مخنیوي په موخه دوه اونۍ وړاندې د هیواد په 16 ولایتونو کې د دوؤ اوونیو لپاره، پوهنتونونو اوښوونځیو ته په ورتګ بندیزونه لګولی دی.
په تیره اوونۍ کې په دغه هیواد کې د کرونا وایرس د مثبتو پيښو زیاتوالي ته په کتو، دعامې روغتیا وزارت پرون د تیرو بندیزونو په دوام نوي محدویتونه هم وضع کړل، چې په ځینو ادارو کې د ډیر عمر لرونکي مامورین به د دوو اونیو لپاره له کورونو دندې تر سره کوي.
ددې ترڅنګ د دولت لخوا په هغو هوټلونو، حوضونو، پارکونو سلمانیو او په نورو هغه ځایونو هم بندیزونه لګیدلي چې ګڼه ګوڼه پکې زیاته وي
