د ماشوم د وژنې وروسته د بکاخېل کډوالو په څلورمه ورځ احتجاج ځنډولی

د بنو بکا خېل کډوالو کېمپ کې مېشت د شمالي وزيرستان بې کوره اغېزمنو او حکومتي چارواکو ترمنځ خبرې کامیابې شوې او انتظامیې لخوا د دوی غوښتنو منلو د باور وروسته احتجاجي پرلت ځنډول شوی دی، او د حکومتي چارواکو د ډاډ وروسته بنو، میرانشا سړک هم د هر ډول ټرېفک لپاره پرانستل شوی دی.

‎پرون د بنو او شمالي وزیرستان انتظامي چارواکي او پوځيان احتجاجي پرلت ته ورغلي، او د متاثرينو ټولې غوښتنې یې منلې دي.

د میرانشا اسسټنټ کمشنر خالد عمران تایید کړه چې د تړون له مخې به په پېښه کې تورنو اهلکارو پرضد د سي ټي ډي ترهګرۍ قانون لاندې مقدمه درج شي، د شهید کورنۍ ته به معاوضه ورکول کېږي او په راتلونکي کې د دا ډول پېښو مخنیوي لپاره ګامونه پورته کېږي.

‎بنو یکاخېل کډوالو کېمپ مخې ته د شمالي وزیرستان څخه بې کوره کډوالو دا احتجاجي پرلت څلور ورځې مخکې د جنورۍ په اخري نېټه وروسته له هغې پيل کړی وو، کله چې د مظاهرچیانو په وینا د امنیتي ځواکونو په ډزو په کېمپ کې مېشت یو تنکی ماشوم ووژل شو او بل ژوبل شوی وو.

‎د ماشوم کورنۍ، د کېمپ اوسيدونکو او د اتمانزو جرګې مشران د انصاف غوښتلو لپاره کېمپ مخې ته بنو میرانشاه سړک تړلی وو او احتجاجي ناسته کې د وژل شوي ماشوم مړی ایښودل شوی او د غوښتنو منلو پورې یې د مړي نه ښخولو ويلي وو.

د اتمانزو جرګې غړی ملک اصل مير وايي، کلونه کیږي جنګ ور په غاړه دی چې پکې وزیرستان په وینو سور دی، هره ورځ چې را پورته کیږي یا د پوځ یا د نامالوم لخوا د وزسرستانیانو وینه یې بهيولې وي.

هغه وويل، "دا کډوال د پوځ تر ساتنې لاندې وو او مونږ غوښتنه دا وه چې دا خلک دې وګوري چې دا ماشوم څومره لوی ترهګر وو".

‎بکا خېل کېمپ: د 11 کلونو کړاوونه

‎د بنو بکاخېل کې د وزيرستاني کډوالو دپاره کېمپ په 2014 کې د شمالي وزيرستان د پوځي عملياتو ضرب عضب له کبله د بې‌کوره شويو متاثرينو لپاره جوړ شوی وو.

‎که څه هم پوځ ادعا کوي چې عمليات بريالي وو او سيمه يې له ترهګرو پاکه کړې، خو تر اوسه زرګونه کورنۍ خپلو سيمو ته ستنې شوې نه‌ دي او د بکا خېل کېمپ کې له سختو ستونزو سره مخ دي.

‎د کېمپ يو اوسېدونکي وهّاب وويل، دوى ته نه پر وخت مالي مرستې رسېږي، نه روغتيايي او تعليمي اسانتياوې شته، او اوس د ناامنۍ له سختو حالاتو سره هم مخ دي.

‎د ده په وینا، د سخت امنیتي نظارت (نګرانۍ) باوجود د کېمپ حالات ورځ تر بلې خرابېږي او وروستۍ پېښې د متاثرينو غوسه لا زياته کړه.

‎د متاثرينو د ستنېدو نامعلوم راتلونکی

‎د حکومتي شمېرو له مخې، تر 23,000 پورې کورنۍ لا هم رسمي بې‌کوره دي، چې حکومت ورته د مياشت هرې کورنۍ ته 20,000 روپۍ مالي مرسته ورکوي، خو غېر رسمي بې‌کوره کورنۍ لا هم ډېري دي.

‎حکومت اعلان کړی وو، د متاثرينو د ستنېدو لپاره به یو منظم پلان جوړوي، خو تر اوسه زرګونه کورنۍ خپلو سيمو ته نه‌دي ستنې شوې او د نامعلوم راتلونکي انتظار کوي.