د پخواني شوروي اتحادي سرتیرو په همدې ورځ یعنې د مې د میاشتې په ۱۵ نیټه، کال ۱۹۸۸ کې له افغانستان څخه په وتلو پیل وکړ.
په افغانستان کې د پخواني شوروي د یرغل پرمهال له لسو تر پنځلس زرو پورې روسي سرتیري وژل شوي وه.
پدغې جګړه کې په میلیونونو افغانان وژل شوي او بې کوره شوي وه.
د شورویانو د هغه مهال مشر میخایل ګورباچوف په افغانستان باندې خپل یرغل چې د ۱۹۷۹ میلادي کال په وروستیو کې پیل شوي وه د شوروي اقتصاد ته سخت ګوزار ورکونکی وګاڼه چې د هیڅ ډول بریا څرک پکې نه لګېده.
د شوروي اتحاد سرتیرو د ۱۹۷۹ میلادي کال په ډیسمبر میاشت کې وروسته له هاغې په افغانستان یرغل وکړ چې د وخت ولسمشر نور محمد ترکی د خپل کمونست سیال حفیظ الله امین د توندلارو پلویانو پواسطه له واکه ګوښه شو.
یرغلګړو شورویانو امین وه واژه او پرځای یې شوریانو ته وفاداره ملګری ببرک کارمل په څوکۍ کښېناوه.
په افغانستان د روسانو یرغل د سړې جګړې په اوج کې رامنځته شو چې په ترڅ کې یې روسانو د هیواد زیاتې سیمې ونیولې.
د متحده ایالاتو د هغه وخت ولسمشر جیمې کارټر د شورویانو ددغه یرغل په غبرګون کې د هغوې پرضد یوشمیر اقتصادي او نور بندیزونه ولګول.
ددې ترڅنګ د وسلو د کنټرول پرسر د امریکا او روسیې ترمنځ خبرې ودرېدې او په ماسکو کې د ۱۹۸۰ میلادي کال د المپیک سیالیو ته امریکايي لوبغاړي ور نه غلل.
د امریکا متحده ایالاتو او یوشمیر نورو هیوادونو لکه پاکستان، سعودي عربستان او چین مجاهدینو ته وسلې ورکړې.
له بده مرغه د روسانو له وتلو سره سره په افغانستان کې جګړه پای ته و نه رسېده او په ۱۹۹۶ میلادي کال کې توند لاري طالبان چې د پاکستان په مدرسو کې روزل شوي وه د پلازمینې کابل واک ترلاسه کړ.
