یورپي یونین یا اروپايي ټولنې د بهرنیو چارو وزیرانو د ګل دوشنبې په ورځ د روس پرضد په یوکرین کې د جګړې له کبله بندیزونه جاري ساتلو فیصله کړې، خو د بشارالاسد د واکه د لېرې کېدو وروسته یې په شام ځینې بندیزونه نرم کړي.
د هنګري لخوا د څو اوونیو ځنډ د ګل، دوشنبې په ورځ ختم شو، چې يورپي یونین وکړې شو چې د روس خلاف بندیزونه د نورو شپږو میاشتو دپاره وغځوي.
خو په بدل کې د هنګري وزیر اعظم ویکټر اوربان ، چې مسکو ته نږدې ګڼلې کیږي په یوکرین ټینګار کوي چې د ټرانزېټ تړون د ختیمدو وروسته سېنټرل (مرکزي) يورپ ته د ګیس پایپ لاین بیرته پرانیزي.
یورپي یونین د مالدووا د انرجۍ ضرورتونو دپاره هم مرستې ځانګړې کړې، کوم چې یورپ وايي د روس لخوا د خطر سره مخ دی.
یورپي یونین چې 27 غړي لري په شام کې د نوي حکومت د راتلو وروسته په مخالف لوري حرکت وکړو او د بشري مرستو د زیاتولو او ځینې بندیزونو د کمولو باندې یې اتفاق وکړو.
د یورپي یونین د بهرنۍ تګلارې مشرې کاجا کالېس وویل، "دا د شام اقتصاد ته وده ورکولای شي او دغه هېواد په خپلو پښو ودرلو کې مرسته کولې شي. "
د شام د بهرنیو چارو وزیر اسد الشیباني د یورپي ټولنې دغه اقدام یو "مثبت ګام" ګرځولی دی.
د یورپي یونین د بهرنیو چارو وزیرانو په غزه کې د ډزبندۍ څخه نیولې د ایران او د ختیځ کانګو د شخړې په اړه هم خبرې کړې.
د یورپي یونین د بهرنیو چارو وزیرانو د غونډې ېوه بله مهمه موضوع د امریکا صدر ټرمپ د نوې انتظامیې سره د تعلقاتو وه.
کاجا کالېس وویل: " لکه څنګه چې امریکا د لا زیاتې تبادلې یا تعامل معاملې په طرف روان دی. یورپ ضروت لري چې خپل صفونه نور مظبوط کړي. مونږ هغه وخت پیاوړي یو کله چې مونږ متحد یو - دا هغه نظر و چې ټولو لرلو."
هغې واشنګټن د یورپ تر ټولو نږدې اتحادي وګرځولو . خو د امریکا صدر ډانلډ ټرمپ لخوا د ګرینلېنډ سیمې د واک ترلاسه کولو د خواهش وروسته ، تجارت، پوځي لګښتونو او ګرینلنډ په اړه کړکېچ زیات شوی دی.
د یورپي ټولنې د بهرنۍ تګارې مشرې کاجا کالېس وویل: "مونږ په ګرینلېنډ خبرې اترې نه کوو." هغې زیاته کړه "البته، مونږ د خپل غړي هېواد، ډنمارک او د هغه خپلواکې سیمې، ګرینلېنډ ملاتړ کوو."
کاجا کالېس د ډیرو هغه طریقو یادونه هم وکړه چې امریکا او یورپي ټولنه یو له بل سره تړلي دي. خو هغې وویل چې یورپ باید د خپل اتحادیانو او مخالفینو سره په معامله کې خپل طاقت په پام کې ونیسي.
Forum