د صوبايي حکومت د شمېرو ترمخه په خېبرپښتونخوا کې تر دا مهال د کرونا وایرس د معلومولو دپاره څه دپاسه ۲۲۰۰۰ کسانو معاینې شوي دي چې د صوبې د آبادۍ په تناسب دا په ۱۶۰۰ کې د یو تن معاینه جوړیږي.
بلخوا څیړونکي وايي خېبرپښتونخوا د صحت په برخه د نورو صوبو په مقابل کې وروسته ده او هم دغه ډول د کرونا وایرس د ټېسټونو کې صوبه شاته پاتې ده.
د خېبر پښتونخوا حکومت وايي په موجوده وخت کې هره ورځ د زرو پورې کسانو د کرونا وایرس معاینات کیږي.
اجمل وزیر چې د خېبر پښتونخوا د اعلا وزیر د اطلاعاتو مشیر دی ویلي په صوبه کې به د ورځې په حساب د کرونا وایرس د معلوموولو معایناتو شمېر ۲۰۰۰ او باالاخر ۱۰۰۰۰ ته رسوي.
تر اوسه پورې په خېبر پښتونخوا کې د کرونا وایرس ۱۸۵ مرګونه رپورټ شوي دي او ۳۲۸۸ کسان دې وایرس ناروغه کړي دي.
خبریال محمود جان بابر ډیوه ته وایي په خېبر پښتونخوا کې د مړینو شرح د نورو صوبو پرتله زیاته ده او دلته د صحت په اړه کارکردګي د نورو صوبو نه وروسته ده.
محمود جان وايي په خېبرپښتونخوا کې په تېرو اووه کلونو کې د صحت په برخه کې کوم پرمختګ نه دی شوی. هغه وویل کرونا وایرس د مخنیوي په لړ کې د خېبر پښتونخوا کارکردګي کمزوري ده.
په خېبرپښتونخوا کې د کرونا وایرس دلاسه د خلکو د مړینې شرح هم زیاته ده. په نورو صوبو کې د دې وایرس نه د مرګ شرح د دوه فیصد نه تر درې فیصد پورې ده خو په خېبرپښتونخوا کې دا شرح د پنځه فیصد او په پېښور کې دا اته فیصد ده.
په خېبرپښتونخوا کې د کرونا وایرس له امله د مرګونو شرح د نورو صوبو په مقابل کې ولې زیاته ده؟ صوبايي حکومت د دې اسباب معلوموولو دپاره یوه کمېټي جوړه کړه ده چې مشر یې ډاکټر امجد محمود ګمارل شوی دی.
