د طالبانو حکومت: له ازبکستانه امریکې ته منتقل شوي هېلیکاپټر باید بیرته افغانستان ته ورکړل شي

د طالبانو د دفاع وزارت وایي د افغانستان د پخواني حکومت د بلېک هاک هغه هېلیکوپټر باید بیرته افغانستان ته وسپارل شي چې ویل کیږي له ازبکستانه امریکې ته منتقل شوې دي ځکه چې وایي‌ دا د افغانستان ملکیت دي.

د طالبانو د دفاع وزارت د شنبې- خالي په ورځ ویلي، هغو رپوټونو اندېښمن کړي‌ دي چې د افغانستان د تېر حکومت د نسکورېدو په وخت له افغانستانه اوزبکستان ته تللې اووه هېلیکاپټر اوس امریکا ته منتقل شوې دي.

وزارت پر خپل ایکس په یو بیان کې ویلي، څنګه چې دا الوتکې د افغانستان ملکیت دي باید بیرته افغانستان ته ور منتقل کړی شي. په بیان کې ویل شوي:

"دا چې یادې الوتکې د هر دلیل له مخې امریکا ته انتقالیږي، موږ ته داسې کول د منلو نه دي، ځکه د افغانستان خلک حق لري د خپل حق دفاع وکړي او پوښتنه وکړي او همسایه هیوادونه باید هم د افغانانو حقونو ته درناوی وکړي".

په تاشقند کې د امریکې د سفارتخانې یوې سرچینې د جمعې په ورځ اې اېف پي خبري ادارې ته تصدیق کړی وو چې اووه هېلیکاپټر امریکې ته ورکړی شوي دي. په دې اړه وړومبی خبر د وي او اې ازبک څانګې خپور کړی وو.

د طالبانو د حکومت د دفاع وزارت په بیان کې راغلي چې "له امریکا څخه هم غواړو چې بېرته افغانستان ته د یادو ټولو الوتکو د را انتقالېدو په لاره کې خنډونه نه واچوي بلکې بیرته یې افغانانو ته وسپاري".

امریکايي چارواکو په رسمي توګه له اوزبکستانه امریکا ته د دغو هېلیکاپټرو د سپارلو په اړه څه نه دي ویلي، خو يو اعلی امريکايي چارواکي د نوم نه څرګندولو په شرط د دغو هېلیکاپټرو سپارل تایيد کړي او ویلي یې دي:

"هو، امريکا له ازبکستانه اووه UH-60 [بلېک هاک هېلیکاپټر] ایستلي دي"، خو په اړه یې نور تفصیل څرګند نه کړ.

د امریکې صدر ډانلډ ټرمپ په دې وروستیو کې مخکیني صدر جوبایډن پر ادارې سختې نیوکې وکړې او ویلي یې دي چې له افغانستانه د امریکايي پوځیانو له وتلو وروسته د اربونو ډالرو په ارزښت پوځي وسلې او آلات یې هلته پریښودل.

ټرمپ وویل، "موږ خپل ټول پوځ بیا جوړ کړ او بیا هغوی [د بایډن ادارې] طالبانو ته په اربونو ډالر ورکړل. هغوی زموږ پوځي وسایل، یوه لویه برخه یې زموږ دښمن ته ورکړه".

صدر ټرمپ زیاته کړه، په افغانستان کې د طالبانو له واکمنۍ وروسته امریکا هغوی ته زیاتې پیسې ورکړې. د ټرمپ په وینا که طالبان پیسې غواړي، باید پاتې پوځي وسایل بیرته امریکا ته ورکړي.

د 2021 کال د اګست په 15 د تېر افغان حکومت له ړنګېدو او کابل ته د طالبانو د وسلوالو له ننوتلو څو ساعته وړاندې یو شمېر افغان پیالټانو له هېواده د ځینو پخوانیو چارواکو او د خپلو خپلوانو د ایستلو لپاره د هېلیکاپټرو په ګډون شاوخوا 60 بېلابېلې پوځي الوتکې اوزبکستان او تاجکستان ته منتقل کړې وې. دغه هېلیکاپټر او الوتکې امریکا د افغانستان جمهوري حکومت ته ورکړې وې.

د منځنۍ اېشیا دغو دوو هیوادونو ته د افغانستان د پخواني پوځ ددغو منتقل شویو الوتکو او هېلیکاپټرو کره شمېر نه دی څرګند کړی، خو له دې وړاندې د امریکې د پوځ یو ویاند راب لوډویک ویلي وو چې 46 الوتکې په اوزبکستان کې او 18 په تاجکستان کې دي.