په خېبرپښتونخوا کې د قدرتي افتونو په وخت د انتظام ادارې [پي ډي اېم اې] په کورمه ضلعه کې په وروستيو کې د شخړو او فرقه ييزه نښتو څخه اغېرمنو د مرستو دپاره 17کروړه روپۍ جاري کړي دي.
پي ډي اېم اې د 1200 کورنيو دپاره خوراکي او غېر خوراکي مواد، خېمې او نور سامانونه هم ورکړي دي.
د افغانستان سره په پوله د خېبرپښتونخوا په کورمه ضلعه کې تېره میاشت د اهل سنت يا سني او شیعه و ترمنځ فرقه ييزه نښتې شوې، د 130 نه زيات کسان پکې وژل شوي وو.
په يادو پېښو کې د بګن ښار په بشپړ ډول سوځول شوی، د کورونو سوځېدو خبرونه هم ورکړل شوي، او پي ډي اېم وايي د کورمې د 1200 بې ځايه کورنيو دپاره مرستې جاري کړل شوي دي.
د پي ډي اېم اې وياند احسان داوړ وايي، د کورمې مرستيال کمشنر ته د مرستو دپاره 17کروړه روپۍ لېږل شوي دي.
وي او اې ډيوه سره خبرو کې نوموړي وويل، په دغو پيسو کې دوه کروړه روپۍ د سمدستي مرستو دپاره دي، او په پاتې 15کروړه روپو کې به په وروستيو کې ترسره نښتو کې د مرګ ژوبلو او کورونو او کاروبارونو اغېزمنو ته ورکولی شي.
هغه زياه کړه، د صوبايي حکومت د لارښونې ترمخه د وژل شوي تن کورنۍ ته لس لکه، سخت ژوبل ته پينځه لکه او عام ژوبل ته درې لکه روپۍ ورکولی شي.
هغه وویل، په سيمه کې د ورانو کورونو او دوکانونو او سامانونو د تاوان سروی روانه ده، هغو ته به هم مرستې ورکولی شي.
د داړو په خبره، تراوسه کره شمېره نه ده خو دوی ته ويل شوي 1200 کورنۍ بې ځايه شوي او 200 پکې هنګو ته تللي دي.
د 21م نومبر څخه د کورمې په بګن علاقه کې د مسافرو په قافله حمله شوې، لږ تر لږه 45 کسان پکې وژل شوي او د هغې وروسته بيا فرقه ييزه نښتې پيل شوې چې نزدې د دوه اوونيو پورې روانې وې.
وروسته د خېبرپښتونخوا حکومت په سيمه کې د ډز بندۍ کولو ويلي او د هغې وروسته چارواکي وايي، په سيمه کې کومه د بدامنۍ پېښه نه ده شوې.
سيمې ته د پښتنو د قامي جرګې قبايلي مشران هم ورغلي، د يادو جرګو استازو ويلي، دوی په سيمه کې د تل پاتې امن او مستقلې ډز بندۍ دپاره هڅې کوي.
Forum