د هند وزیراعظم نریندرا مودي وایي چې د کرونا وبا، هند لړزولی دی. مودي چې د اتوار/یکشنبې په ورځ یې اولس ته د رېډیو د لارې خپله میاشتېنۍ وینا کوله، په خلکو یې ټینګار وکړ چې د کرونا وېکسین دې ولګوي او د وېکسینو په اړه ګنګوسو باندې دې غلط نشي.
مودي دا وینا په داسې وخت کې وکړه چې هند کې د کرونا وبا کېسونه بېحده زیات شوي او په نوې ډېلي کې لګېدلی لاکډاون چې د ګل/دوشنبې په ورځ ختمېده، بیا یوه هفته غځول شوی دی.
د هند صحت وزارت ویلي چې په تېره یوه شپه ورځ کې په ټول هند کې قریب درې نیم لاکه د کرونا وبا نوي کېسونه موندل شوي دي چې د نړۍ په کچه یو بل ریکارډ ګڼل کیږي. د دې ترڅنګ، د صحت چارواکو دا هم ویلي چې دا شمېرې ممکن د حقیقي شمېرو نه ډېرې کمې وي. د نیویارک ټایمز په حواله، دا چې د هند د صحت وزارت دا څو ورځې د کرونا مرض د نویو روزانه کېسونو څه باندې درې لکه شمېرې رپوټ کوي، «د کرونا وایرس د حقیقي خورېدو یوازې یوه برخه څرګندوي.»
د امریکا مرستې:
په امریکا باندې د عالمي ټولنې لخوا فشار دی چې خپل ځیني ذخیره ساتل شوي وېکسینونه دې هند او نورو اړو هېوادونو ته وکړي. د جانز هاپکېنز پوهنتون د کروناوایرس د څېړنې مرکز ترمخه، هند تر اوسه قریب یو سلو اته دېرش (۱۳۸) میلینه ډوزونه/خوراکونه د وېکسین خپلو خلکو ته لګولي چې په دې کې د ټول هندوستان د آباتۍ صرف ۱.۶ فیصده خلکو پوره وېکسین اخیستی دی.
د امریکا صدر جو بایډن د اتوار/یکشنبې په ورځ وعده وکړه چې هند سره به مرسته کوي. بایډن د خپل ټویټر پاڼې نه اعلان وکړ: «هماغسې چې د عالمي وبا په ابتدا کې کله چې زمونږ هسپتالونه له ستونزو سره مخ و، هند امریکا ته امداد راولېږه، مونږ دا عزم لرو چې د ضرورت په دې وخت کې له هند سره مرسته وکړو.»
د امریکا د قامي سلامتیا سلاکار جېک سولېوان د اتوار/یکشنبې په ورځ د هند د قامي سلامتیا له سلاکار اجیت دووال سره وغږېد او په هند کې یې د کرونا وبا د وروستۍ څپې په اړه ورسره خواخوږي څرګنده کړه.
امریکا وعده وکړه هغه ځانګړي خام مواد چې د وېکسین جوړولو کې ورنه کار اخیستل کیږي، هغه په فوري توګه د هند وېکسین جوړولو کارخانو ته په اختیار کې ورکړي. د دې نه علاوه، امریکا به هند ته درمل، د کرونا د فوري ټېسټ بستې، وېنټلېټرونه، او د طبي کارکنانو دپاره د تحفظ جامې هم ورولېږي.
د امریکا ترڅنګ، نور ملکونه لکه برطانیې، فرانس، جرمني او آن د هند رقیب او ګاونډي هېواد پاکستان هم ویلي چې دوی به هند ته مرسته ولېږي.
په هند کې د کرونا د دې نوې څپې په راتګ سره، په سرښار ډیلي کې د اکسیجن کمښت هم مخې ته راغلی دی، او ډېرو مریضانو ته اکسیجن نه رسیږي.
هند د آباتۍ په لحاظ، د چین نه وروسته د نړۍ تر ټولو سر ملک دی چې آباتي یې یو اعشاریه څلور بلینه (۱.۴ بلینه) کسانو ته رسیږي.
