د پاکستان د سيند صوبې پوليس وايي، ميرپور خاص ضلعه کې د پوليسو سره نښته کې يو تن وژل شوی، وروسته د دغه تن پېژندګلو د شاهنواز په نوم شوې، څوک چې د مذهب په سپکاوي کولو تورن وو. نن د اسلام اباد يو عدالت يوې مېرمن ته د مذهب د سپکاوي په قضيه کې د مرګ سزا اورولې ده.

پاکستان کې دا په يوه اوونۍ کې دویمه پېښه ده چې د مذهب په سپکاوي تورن وژل شوی دی، اونۍ وړاندې په کوټه کې د مذهب د سپکاوي په تور بندي تن په پوليس تاڼه کې د پوليسو په ډزو وژل شوی وو.

سيند کې د مذهب په سپکاوي تورن تن

د ميرپور خان ضلعې د پوليسو مشر اېس اېس پي اسدعلي چودري وي او اې ډيوه ته وويل، تېره شپه د 18م او 19م ستمبر مينځنۍ شپه کې، په موټر سايکل دوه تنه روان وو، پوليسو ورته د ودرېدو اشاره کړې او هغوی نه وو ودرېدلي، په پوليسو یې ډزې کړي، او د پوليسو په ډزو کې بیا يو تن شوی دی.

اسدعلي چودري وويل، وروسته د وژل شوي تن پېژندګلو شوې چې هغه د مذهب د سپکاوي په مقدمه کې تورن وو، تښتېدو، او په پوليسو یې ډزې کړي او بيا د پوليسو په ډزو کې وژل شوی دی.

خو په پولیس مقدمه کې ويل شوي، دغه کسان د پوليسو نه تښتېدل، يو غورځېدلی، ژوبل شوی او چې روغتون ته وړل شوی هلته یې ساه ورکړې ده.

وژل شوی تن ډاکټر شاهنواز نوميږي، د هغه پرضد په 16م ستمبر د ميرپور خاص سره جوختې پرتې په عمرکوټ ضلعه کې د مذهب د سپکاوي مقدمه درج شوې، په هغه تور لګول شوی وو چې په ټولنيزو رسنيو یې د مذهب د سپکاوي پوسټ کړی وو.

يو ځايي تن د نوم نه ښکاره کولو په شرط وي او اې ډیوه ته وويل، د ډاکټر شاهنواز پرضد د دوو ورځو راهسې په عمر کوټ کې د مذهبي تنظيمونو لخوا مظاهرې روانې وې، او داسې ويل کيږي، چې هغه د عمر کوټ نه وتلی، په کراچۍ کې پوليسو نيولی وو، او تېره شپه بيا په ميرپورخاص کې دغه پېښه شوې ده.

ياد تن وويل، د ډاکټر لخوا پرون يو بيان هم خپور شوی وو او هغه د مذهب د سپکاوي د بیان رد کړی او ويلي يې وو چې د هغه د فېس بک آی ډي هېک شوې او بل چا ترې دغه پوسټ کړی وو.

عيسايي مېرمن ته د مرګ سزا

د رپورټونو ترمخه د اسلام اباد يو ځايي عدالت نن په 19م ستمبر د مذهب د سپکاوي په قضيه کې يوې عيسايي مېرمن ته د مرګ سزا اورولې ده.

ويل شوي، اسلام اباد کې د الېکټرانک کرايم اېکټ، پيکا د قانون لاندې د ځانګړي عدالت جج افضل مجوکا دغه فيصله اورولې ده.

د رپورټونو ترمخه، د اسلام اباد يوې عيسايي مېرمن شګفته باندې تور وو چې درې څلور کاله وړاندې یې په وټس اېسپ ګروپ کې د مذهب د سپکاوي مواد خپاره کړي وو.

پاکستان کې د مذهب د سپکاوي پېښې

د پاکستان په سيند صوبه کې دا پېښه په داسې وخت کې شوې چې يوه اونۍ وړاندې په کوټه کې د توهين رسالت يا مذهب د سپکاوي په مقدمه کې يو تورن تن چې د کوټې کېنټ پوليس په تاڼه کې بندي وو، د تاڼې يو پوليس عسکر پرې په حوالات کې دننه ډزې کړي او دغه تورن تن یې وژلی وو.

اسلامي نظرياتي کونسل وايي د داسې ډول پېښو کې، چې څوک وسله راواخلي او په خپل سر اقدام وکړي، د دې جواز نه شي وړاندې کول کېدی.

په کوټه کې په پوليس تاڼه کې دننه کې د وژل شوي تن کورنۍ پرون په يوه خبري غونډې کې اعلان کړی چې دوی هغه پوليس اهلکار معاف کوي، چا چې د مذهب د سپکاوي په تور د دوی خپلوان په ډزو وژلی وو.

پاکستان کې وخت په وخت د مذهب د سپکاوي د پېښو او په دغو پېښو کې د تورنو کسانو د خلکو په د وژنو خبرونه مخې ته راځي.

اسلامي نظرياتي کونسل څه وايي؟

پاکستان کې د اسلامي نظرياتي کونسل مشر مولانا راغب حسېن نعيمي يوه اوونۍ وړاندې وي او اې ډیوه ته ویلي وو، د داسې پېښو کېدو څو علتونه وي.

وي او اې ډيوه سره خبرو کې وويل، ټولنه د قانون، د قانون عملدارۍ، پوهه خلکو او غوره انتظامیه باندې مشتمله بندوبست نوم دی، او هغه ټولنې په ښه انداز چليږي چرته چې هر څوک د خپل کار سره کار ساتي.

نوموړي وويل، "پاکستانۍ ټولنه د تېرو څو کلونو راهسې د ټولنيزې، مذهبي، اقتصادي او اخلاقۍ پستۍ سره مخ ده، او د هغې له امله مونږ هره ورځ د مختلفو جرمونو کېدل وينو، پاکستان کې دا وخت په مختلفو عدالتونو کې د وژنو خواوشا 50,000 قضیې د بحث لاندې دي او داسې نورې قضيې هم دي".

ښاغلي نعيمي وويل، ځکه خلک په خپله د مسلو د حل نورې لارې لټوي، د پوليس پلټنيزه نظام او عدالتونو کارروايانې هم داسې دي او مجرمان د عدالتونو نه خلاصيږي، خو "د توهين مذهب د قضيو هوارولو متبادلې لارې نشته چې هوارې شي، ځکه د کوټې په څېر پېښې کيږي".

خو نوموړي وویل، "د دې هر باوجود بيا هم د کوټې په څېر پېښو جواز نه شي وړاندې کول کېدی، چې څوک وسله راواخلي او که هر ډول پېښه وي چې په خپل سر پکې داسې اقدام وکړي".

په ملګرو ملتونو کې د پاکستان ځانګړي استازي منير اکرم يو ځل بيا ويلي، ترهګري په افغانستان کې دننه او له دې هېواده بهر سيمې او نړۍ ته يوازينۍ تر ټولو سنګینه خطره ده. نوموړي تور پورې کړی چې تحریک طالبان پاکستان اوس د خپل واکۍ غوښتونکو بلوچ تنظيمونو لکه مجيد بريګېډ سره هم همغږي لري.

‎څيړونکي وايي، تحریک طالبان پاکستان او بلوڅ بېلتون غوښتونکې ډلې د یو بل نه جدا هدفونه لري. خو په ملګرو ملتونو کې د پاکستان استازي تور پورې کړی چې اوس پاکستاني طالبان د بلوڅ بېلتون غوښتونکو سره همغږي لري. پاکستان دواړه ډلې ترهګرې بولي.

خو څيړونکي وايي د بلوچستان بېلتون غوښتونکې ډلې ځان له د ریاست لپاره جګړه کوي.

پېښور پوهنتون کې د جرنلزم استاز او څيړونکی ډاکټر عرفان اشرف وايي، "د افغانستان په کشاله کې د پاکستان د رياست تګلارې ذمه وارې دي، هغه واپس کول پکار دي، خو په بلوچستان او خېبر پښتونخوا کې د وسايلو تقسیم لويه مسله ده او د بلوچستان مسله نوره هم سېوا ده ځکه چې د مقامي خلکو نمايندګي په پارليمان کې نشته بلکې غېر جمهوري طاقتونه هلته کې حکومتونه راولي او بدلوي یې".

‎ښاغلي اکرم په ملګرو ملتونو کې څو ځله د افغان طالبانو په پلوۍ بیانونه ورکړي. نوموړي یو ځل په ښځو باندې د طالبانو د بندیزونو دفاع هم کړې او د هغې لپاره یې د افغان کلتور د عذر په توګه یاد کړی وو خو اوس وايي چې ترهګرو ډلو ته د طالبانو د حکومت تحفظ تر لاسه دی.

دغه نظر پاکستان کې ځيني څېړونکي هم لري.

منصور خان مسيد، د فاټا ريسرچ سنټر څيړنکار منصور خان مسيد وايي، "ټى ټى پى ته د افغان طالبانو بشپړ ملاتړ ترلاسه دی او که د هغوی ملاتړ نه وي ورسره نو دوی هلته يوه ورځ هم نه شي پاتې کېدی، ټي ټي پي 6,000 خلک لري او افغان طالبان غټ فورس دی خو نه یې ختموي، د تحريک طالبان پاکستان وسله وال د کابل په ګډون هر مهم ځای کې پراته دي او هلته ښه اثر هم لري".

افغان طالبانو د ښاغلي اکرم نوي تورونو ته تر دې دمه ځواب نه دی ویلی، خو دا خبره یې مخکې څو واره کړې چې پاکستان کې روانه جګړه او یا د پاکستاني طالبانو وجود په کابل کې د هغوی د واکمنۍ نه مخکې موجود وو. او وايي په هيواد کې بهرني ترهګر فعالیت نه لري.

خو پاکستان کې دا خبره اوس عامه ده چې یادې ډلې افغانستان کې خوندي ځایونه لري.

‎د امنیتي چارو کارپوه عبدالله خان وايي، "هغوي ته چې کومه وسله ترلاسه ده هغه عصري او جديد وسله ده او په خصوصي توګه امريکايي وسله هم د هغوي سره ليدل کېږي، د هغوي تربيه هم ډيره ښه شوې ده، بلوچستان خو يوه غريبه صوبه ده او دغه وسله وال په خپله هم وايي چې په غرونو کې اوسيږي او دا دومره جديد وسله ترلاسه کول د پېسو بغېر ترلاسه کول ممکنه نه ده".

‎پاکستاني چارواکو د روان کال 2024 په پيل کې دعوه کړې وه چې په افغانستان کې د ټي ټي پي وسله والې ډلې تر 6,000 زیات وسله وال دي او په تېره جولای مياشت کې ملګرو ملتونو هم په خپل رپورټ کې دا خبره تاييد کړې وه.

پاکستان درې کاله وړاندې په افغانستان کې د طالبانو د واکمنۍ هرکلی کړی وو او دا تمه کېدله چې افغان طالبان به پاکستان کې دننه د ترهګرۍ مخنيوي کې مرسته وکړي خو اوس څيړونکي وايي په کابل کې د طالبانو واک پاکستاني طالبان لا نور ډاډ کړي دي.

د خېبر قبايلي ضلعې د جمرود بګياړۍ پوستې سره د تيرا راجګل کډوالو احتجاجي پرلت لا هم روان دی او افغانستان سره دوه اړخيزه او ټرانزټ تجارت په ټپه ودرېدلی دی.

بلخوا د پرلتوالو د جرګې غړو او پېښور انتظاميې په منځګريتوب پوځي چارواکو سره خبرې اترې روانې دي.

د احتجاجي پرلت يو مشر ملک برکت اپريدی وايي، بېګا یې د پېښور ډويژن کمشنر رياض مسيد سره خبرې اترې شوي، او پرلتوالو ته یې ويلي، چې کمشنر ورته جرګې ته ځواب کړی چې پوځ شپږ مياشتې وخت غواړي او پس له هغې دوی ليکلو ته تيار دي چې د علاقې خلک به خپلو سيمو ته ستان کړل شي او غوښتنې به یې ومنل شي.

د ملک برکت اپريدی په خبره، انتظامیې ته یې ويلي شپږ میاشتې موده ډېره ده په دوو مياشتو کې دې ځينې خلک وليږي. هغه زياته کړه نن به بيا کمشنر د پوځي چارواکو سره خبره کوي په دې دوو مياشتو باندې او بيا به د جرګې غړي خبروي.

د خېبر بګياړي پوستې سره د تيرا راجګل کډوالو پرلت په دوه دېرشمه (32) ورځ هم دوام لري، دغه احتجاج له دې وړاندې د خېبر په دروازه يا باب خېبر باندې 17 ورځې روان وو، د اوسني پرلت له امله د افغانستان او پاکستان ترمنځ د تورخم په غټه لاره د ګاډو لوی لوی قطارونه دواړو خواو ته ودرېدلي دي.

خو پرلتوال وايي د پېښور انتظاميې سره يې خبرې په مثبت لوري روانې دي.

د پرلت بل ګډون وال ملک سيد اغا جان وايي، "مونږ نه داسې دروازه نه ده پاتې شوې چې هغه مونږ ټکولې نه وي او پرې ورننوتلي نه يو او مونږ ته چې هرڅوک وايي چې مذاکرات راسره وکړئ نو مونږ يې ورسره کوو".

هغه وويل، "که هغه کراچۍ، بلوچستان، اسلام اباد ولې نه وي خو مونږ خبرو اترو ته تيار يو او هرڅه ته تيار يو چې مونږ دا مسله حل شي".

د خېبر تيرا راجګل سيمې نه بې کوره شوو کډوالو له تېرې يوې مياشتې راهسې احتجاجي پرلت پيل کړی او غوښتنه کوي دوی ته دې اجازه ورکړل شي چې خپلو کورونو ته ستانه شي.

پرلتوال وايي که حکومت يې غوښتنې ومني نو لاره به خلاصه کړي او د خلکو مشکل به اسان شي.

د تيرا کډوال وايي، دوی ته دې ګناه وويل شي چې د دغه ګناه د لاسه یې بې کوره کړي دي.

ګل زرين نومې کډوال وايي، "مونږ کومه ګناه کړې چې خپل وطن ته مو نه پرېږدي، مونږ کومه ګناه کړې چې ټول خلک ستانه شول او مونږ کومه ګناه کړې د متاثرينو فهرست مو نه جوړېږي".

سوداګر وايي له تېرې يوې مياشتې راهسې په تورخم لاره افغانستان سره دوه اړخيزه او ټرانزټ تجارت ولاړ دی او لوی مالي زيان ته يې ورمخامخ کړي دي.

ډرايورانو په وروستيو کې وي او اې ډيوه ته ويلي وو چې هغوی سره د خرڅې روپۍ خلاصې شولې.

د ګاډي يو ډرايور حبیب الله وايي، "مشکلات ډېر دي، نه اودس، نه لمونځ او نه نور سهولت شته او نه مو څوک پرلت ته نژدې ورپرېږدي چې اوبه ترې راوړو او خپل حاجت پرې پوره کړو".

هغه وويل، "مونږ حکومت نه غوښتنه کوو چې دې خلکو مشکل حل کړئ او په مينځ کې يې مونږ تبا کړو، ټايرونه غرک شو، ټماټرلاړل او ګاډو باندې مو په شلمان کې کندې ډکې شولې".

احتجاج کونکي وايي ، د کال 2011/12م څخه د پوځي عملياتو د لاسه د 6000 نه تر 6500 پورې کورنۍ چې د تيرا راجګل نه بې کوره شوې او تراوسه ستنېدو ته په تمه دي.

د پاکستان د بلوچستان صوبې د سرښار کوټې څخه د پولیو یوه بله تازه پېښه مخې ته راغلې ده چې دې سره د روان کال په اوږدو کې د پاکستان دننه د پولیو د مثبتو پېښو شمېر 18 ته رسېدلی دی.

د پاکستان د روغتیا د ملي ادارې د پولیو د مخنیوي لیبارټرۍ د کوټې په قدري اباد یونین کونسل کې یوه دوه کلن ماشوم ته د پولیو وایرس ورپورې کېدو پخلی کړی دی.

په روان کال کې دا له کوټې څخه د پولیو مخې ته راغلې دویمه اؤ په بلوچستان کې مخې ته راغلې 13مه پېښه ده.

د پولیو د مخنیوي لپاره د پاکستان د وزیراعظم استازې عایشه رضا فاروق بلوچستان کې د پولیو پېښو کې په اضافه اندېښنه ښودلې اؤ هر ماشوم ته یې د پولیو نه دخوندیتوب د څاڅکو ورکولو په ضرورت ټینګار کړی دی.

پخپل یو بیان کې د وزیراعظم استازې ویلي "د کوټې نه د پولیو دا نوې پېښه ښیي چې مونږ ته به د پولیو وایرس د مخینوي لپاره په عاجل ډول د ټولو ماشومانو قوت مدافعت سیوا کول وي".

هغې ویلي "مونږ چې دا څه وینو دا پروسکال د بلوچستان په ځېنو سیمو کې د پولیو کمپینونو په وړاندې د خنډانو راولاړولو اؤ ماشومانو ته د پولیو ضد څاڅکو د نه رسېدو نتیجه ده"

هغې ویلي د پاکستان اؤ افغانستان د پولې دواړو غاړو ته د پولیو سیوا کېدونکې پېښې په ټول ملک کې د ماشومانو لپاره د خطرې یو علامت دی اؤ مونږ ته اړینه ده چې خپلو ماشومانو ته په وخت د پولیو نه د خوندیتوب څاڅکي ورکړو.

د پاکستان پولیو پروګرام په دې وروستیو کې له 9م تر 13م ستمبر پورې په 115 هغو ضلعو کې د پولیو په ضد کمپاین چلولی ؤ چې د پولیو په حواله زیاتې خطرناکې شمیرل کیږي.

د پولیو پروګرام له مخې په دې کمپین کې درې کروړه اؤ 25 لکو ماشومانو ته د پولیو نه د خوندیتوب څاڅکي ورکړل شوي وؤ.

د پاکستان په دوه ورځني سفر بوخت د روس مرستیال وزیراعظم الیکسي اوورچک د پاکستان د پوځ مشر جنرال عاصم منیر سره لیده کاته کړي اؤ د سیمې د امنیت اؤ نورو مهمو چارو په اړوند یې ورسره خیالات تبادله کړي دي.

پاکستان وایي د روس سره تعلقاتو ته وده ورکول یې د خارجه پالیسۍ مهمه برخه ده اؤ د پاکستان اؤ روس ترمځ د لوړې کچې د تماسونو له امله به د دواړو هیوادونو اړیکې لا پسې پراختیا ومومي.

د چارشنبې- شورو په ورځ د پاکستان د پوځ د عامه اړیکو څانګې ای ایس پي آر پخپل بیان کې ویلي، د پوځ مشر جنرال عاصم منیر د روس مرستیال وزیراعظم سره لیدنه کې د روس سره د روایتي دفاعي مرستې د ودې هوډ تازه کړی دی.

د پاکستان د پوځي ویاند له مخې د روس مرستیال وزیراعظم د ترهګرۍ د مخنیوي په لړ کې د پاکستان د پوځ هڅې ستایلې اؤ سیمه کې امن ته د ودې ورکولو لپاره یې هم د پاکستاني ځواکونو د کردار ستاینه کړې ده.

د روس مرستیال وزیراعظم پخپل دوه ورځني سفر اسلام اباد ته له رارسېدو وروسته تېره ورځ د خپل پاکستاني سیال اسحاق ډار سره یو ګډ مطبوعاتي کانفرنس ته وینا هم کړې وه.

په دغه مهال د پاکستان مرستیال وزیراعظم اؤ خارجه وزیر اسحاق ډار ویلي چې روس سره خپلو اړیکو ته وده ورکول د پاکستان د خارجه پالیسۍ مهمه برخه ده اؤ د پاکستان اؤ روس د لوړې کچې د تماسونو له امله به د دواړو هیوادونو اړیکې له پسې وغځيږي.

اسحاق ډار ویلي د روس اؤ پاکستان خپلو کې په اړونده درناوي اؤ مفاد اډاڼه دوه اړخیزه تعلقات په مثبت لوري روان شوي اؤ د روس اؤ ړپاکستان تجارتي اؤ معاشي اړیکو کې اضافه د ستایلو ده.

هغه وویل پاکستان د روس سره ولسي،کلتوري اؤ نورو څانګو کې مرستو غځولو ته کلک هوډ لري اؤ د شنګهايي د همکاریو په سازمان کې د پاکستان په مرستې کولو د روس مننه کوي.

د هغه وینا وه چې د پاکستان اؤ روس تر منځ د وزیرانو په کچه د کمیشن د راتلونکې غونډې لپاره تیارۍ روانې دي.

په دغه موقعه د روس مرستیال وزیراعظم الیکسي اوورچک ویلي د پاکستان اؤ روس د سفارتي اړیکو ۷۵ کاله وشول.

هغه وویل اسحاق ډار سره یې د دوه اړخیزه تعلقاتو په بیلابیلو اړخونو خبرې کړي اؤ په اکنامک یونین کې د پاکستان په ګډون یې هم ورسره خیالات تبادله کړي دي.

نوموړي وویل راتلونکې میاشت کې پاکستان ته د روس د وزیراعظم سفر د ځانګړي ارزښت وړ دی.

پاکستان ته د روس پلاوی دا سفر په داسې وخت کې کوي، چې پاکستان له سختو معاشي او امنيتي ستونزو سره مخ دی او روس هم د اوکراین شخړې له امله د نړیوالو بندیزونو او د نيوکو ښکار دی.

د نړیوالو چارو کار پوهه تېمور خان ډيوه ته وايي، "د دورې اصل مقصد خو تجارت، پياوړې رابطې او د انرژۍ په څانګه کې انفراسټرکچر جوړول دي. خو امريکي چې د پاکستان د بيلسټک ميزايل پروګرام په پُرزو چې بنديزونه ولګول او روس سره يي اوکراین په اړه اړيکې نورې هم کړکیچنې شوې نو په داسې کې د پاکستان او د روس رابطې ډير ارزښت لري"

په کال 2023م کې پخواني وزیراعظم عمران خان د روس سفر هغه وخت کړی و چې روس په اوکراين يرغل کړی و.

د عمران خان په سفر نه يواځی پاکستان دننه نيوکې شوې وې، بلکې امریکې پرې هم د ناخوښۍ څرګندونه کړې وه.

د مطبوعاتي رپورټونو ترمخه په پاکستان داسې تورونه هم لګي چې روس او اوکراين جنګ کې پاکستان په پټه په اوکراين د میلینونو ډالرو وسله خرڅه کړې وه خو تیر د پاکستان نګران حکومت داسې خبرونه په کلکه رد کړي وو.

څيړونکي وايي روس سره تعلقات پراخه کولو سره پاکستان او د امريکې تعلقات اغېزمن کيدای شي ځکه امريکا به چري هم نه غواړي چې په دې سيمه کې د روس اثر سېوا شي.