د پاکستان د پلازمینې اسلام اباد نه 16 کاله وروسته په وړومبي ځل د پولیو پېښه مخې ته راغلې ده چې دې سره د روان کال په اوږدو کې په پاکستان کې مخې ته راغلې د پولیو د پېښو شمېره 17 ته رسېدلې ده.

د پاکستان د روغتیا قامي ادارې د پولیو د مخنیوي د لیبارټرۍ له مخې د اسلام اباد په یونین کونسل 4 کې یو ماشوم ته د پولیو د وایرس ورپورې کېدو پخلی شوی دی.

پولیو د مخنیوي لپاره د پاکستان د وزیراعظم استازې عایشه رضا فاروق ویلي له بده مرغه یو بل پاکستانی ماشوم په داسې ناروغۍ اخته شوی چې هیڅ علاج یې نشته، خو د پولیو نه د خوندیتوب اسانه لاره د پولیو ویکسین دي .

پخپل یو بیان کې هغې ویلي ملک کې د پولیو ناروغۍ خوریدو ته په کتلو سره د پولیو پروګرام ټولو صوبو اؤ ضلعو سره په ګډه یوه هر اړخیزه تګلاره جوړه کړې ده چې د هغې مقصد د پولیو د مخنیوي د پروګرام معیار ښه کول، د دې وایرس د خورېدو مخه نیول اؤ د ټولو ماشومانو ویکسین پورې لاس رسی باوري کول دي.

هغې ویلي د 9 ستمبر نه به د پولیو ډلې 115 ضلعو کې هر کور ته ځان رسوي اؤ تر دریوؤ کروړو زیاتو ماشومانو ته به د پولیو نه د خوندیتوب څاڅکي ورکوي.

د نېشنل ایمرجنسي اپریشنز سینټر رابطه کار انوار الحق ویلي چې د 9م ستمبر نه پيل کېدونکي د پولیو د مخنیوي کمپاین کې په ځانګړې توګه هغه ضلعې شامل کړل شوي چې پکې د پولیو وایرس د شتون پخلی شوی دی اؤ چرته چې د دغه وایرس د لا خوریدو خطره زیاته ده.

په اسلام اباد کې د پولیو ددې تازه پېښې مخې ته د راتلو سره پاکستان کې د روان کال په مهال د پولیو د پېښو شمیره 17ؤ ته رسېدلې ده.

تر دې وړاندې د پولیو 12 پېښې له بلوچستان ،درې د سیند اؤ یوه د پنجاب نه رپورټ شوې ده،

په نړۍ کې دا مهال پاکستان اؤ افغانستان هغه دوه یوازیني هیوادونه پاتې شوي چې تر اوسه پکې د پولیو ناروغي موجود ده

په پنجاب کې د ترهګرۍ ضد محکمې( سي ټي ډي) دعوه کړې ده چې تېره میاشت یې په بیلابیلو عملیاتو کې د صوبې د مختلفو سیمو نه 33 ترهګر نیولي دي.

سي ټي ډي وایي په صوبه کې یې د استخباراتي معلوماتو په اساس 475 عملیات کړي اؤ په دې کې یې د مهمو ترهګرو د نیولو تر څنګ له هغوي وسلې اؤ مهمات هم ترلاسه کړي دي.

د پاکستان کې د څېړنې د ادارې پاکستان انسټي ټيوټ فار پيس اسټډیز د رپورټ له مخې په تېره یوه میاشت کې د پاکستان دننه په ترهګریزو بریدونو کې اضافه شوې ده اؤ د جولاي د میاشتې د 38 بریدونو په مقابله کې يه اګست کې په ګرد هیواد کې 59 ترهګریز بریدونه شوي دي.

د پنجاب د ترهګرۍ ضد محکمې په بیان کې ویل شوي د صوبې بیلابیلو برخو کې د استخباراتي معلوماتو په اساس ترسره شوؤ علمیاتو کې 33 ترهګر نیول شوي.

ددغو نیول شوؤ ترهګرو تعلق د وسله والو ډلو ټي ټي پي،داعش،القاعده،سپاه صحابه پاکستان،لشکر جهنګوي ، جماعت الاحرار اؤ زینبیون بریګیډ سره ښودل شوی،

د ترهګرۍ ضد محکمې ویلي ددې استخباراتي عملیاتو په مهال له 475 شکمنو کسانو پلټنې شوي اؤ له هغوي چاودېدونکي مواد، وسلې اؤ نور مهمات ترلاسه شوي.

سي ټي ډي ویلي دا عملیات یې د پنجاب بیلابیلو ضلعو کې د ترهګرۍ په موثره توګه د مقابلې کولو اؤ د کومې ناوړه پېښې نه د ژغورل کېدو په خاطر کړي دي.

د ترهګرۍ ضد محکمې د بیان له مخې 33 شکمن ترهګر یې له لاهور، شیخو پوره، حافظ اباد، رحیم یار خان، اټک، ننکانه صاحب، بهاولنګر،ګوجرانواله، میانوالي، جھنګ، خوشاب، سرګودھا، فیصل اباد، راولپنډۍ، نارووال، ساهیوال او بھکر څخه نیولي دي،

پاکستان تحریک انصاف ګوند نن(اتوار) په اسلام اباد کې په داسې حال کې د جلسې تابیا کړې ده چې د هیواد صدر اصف علي زرداري تر دې یوه ورځ وړاندې پلازمینه کې د جلسو اؤ اجتماعاتو په اړوند پارلیمان نه منظور شوې قانوني مسوده لاسلیک کړې اؤ هغې د قانون بڼه خپله کړې ده.

تر دې وړاندې تحریک انصاف ګوند پینځه وارې په اسلام اباد کې خپله جلسه منسوخ کړې ده خو د ګوند مشرانو ویلي چې دا ځل به په هر حال کې جلسه کوي اؤ دعوه یې کړې ده چې دا به یوه تاریخي جلسه وي.

جلسه کې د ګډون لپاره د ملک د بیلابیلو برخو نه د پي ټي آي د ورکرانو قافلې اسلام اباد ته روانې شوې دي اؤ اسلام اباد ته ددغو قافلو د ورتګ د مخنیوي په غرض د اسلام اباد زیاتره مهمې لارې اؤ سړکونه په کنټینرونو تړل شوي دي.

تحریک انصاف ګوند نن په اتم ستمبر د کېدونکې جلسې ځای هم بدل کړی اؤ ټاکل شوې ده اوس به دا جلسه د سنګجاني په انټر سیکشن کې کیږي، تر دې وړاندې یاد ګوند ټینګار کولو چې جلسه به یې د اسلام اباد په ترنول چوک کې وي.

تحریک انصاف ګوند ویلي چې د جلسې لپاره یې ټولې تیارۍ سرته رسولي دي اؤ حتی د ګوند زیاتره فعالانو د خالي یا شنبې د ورځې نه ځانونه اسلام اباد ته رسولي دي.

پي ټي آي خپله دا جلسه په داسې حال کې کوي چې یوه ورځ وړاندې د هیواد صدر اصف علي زراداري اسلام اباد کې د اجتماعاتو په اړه د پارلیمان نه منظور شوې قانوني مسوده لاسلیک کړې ده.

دغه قانوني مسوده چې د صدر له لاسلیک وروسته یې د قانون بڼه اخستې ، له مخې یې پرته له اجازې اسلام اباد کې په جلسې په کولو د دریوؤ کالو د بند اؤ جرمانې سزا ټاکل شوې ده اؤ که یو څوک له عدالت درې کاله سزاوار شي اؤ بیا په دویم ځل هم دغه جرم وکړي نو په دویم ځلي به یې سزا 10 کاله وي.

دې نوي قانون ته د پرامن اجتماع او امن عامه ایکټ 2024 نوم ورکړل شوی دی.

د نوي قانون له مخې حکومت د اسلام اباد کومه مخصوصه سیمه ریډ زون یا د سخت امنتیت ساحه ګرځولی شي چې هلته به په جلسو کولو بندیز وي .

قامي اسمبلۍ د جمعې په ورځ ددې قانوني مسودې منظوري ورکړې وه.

د تحریک انصاف ګوند چیرمین بیرسټر ګوهر خان د خالي په ورځ د جلسې د تیاریو له جاج اخستو وروسته میډیا سره خبرو کې ویلي وؤ چې هغوي ته د اسلام اباد انتظامیې د جلسې اجازت نامه ورکړې ده.

د تحریک انصاف باني مشر عمران خان د خالي په ورځ اډیاله زندان کې خبریالانو ته ویلي وؤ چې د 22 اګست د جلسې منسوخ کولو لپاره هغه ته منتونه شوي وؤ.

هغه ویلي په اتم ستمبر د جلسې کولو باور ورکړل شوي خو زیاته کړې یې وه چې اوس هم ورته په جلسه کې خنډان راپورته کولی شي.

تر دې وړاندې پي ټي آي په 22م اګست اسلام اباد کې جلسه اعلان کړې وه خو له دغې جلسې یوه ورځ وړاندې بیا د ګوند یو مشر اعظم سواتي اعلان کړی ؤ چې د عمران خان په وینا جلسه ځنډول شوې ده.

اسلام اباد کې د پي ټي آي د ننۍ جلسې په موقعه د جي ټي روډ په شمول زیاتره مهمې لارې په کنټینرونو تړل شوي دي.

د اسلام اباد ډپټي کمشنر ویلي تحریک انصاف ته چې د جلسې کوم اجازت ورکړل شوی هغه مشروط دی اؤ که خلاف ورزي وکړل شوه نو د جلسو اؤ جلوسونو په اړوند جوړ شوی نوی قانون به عملي کیږي.

د اسلام اباد ډپټي کمشر عرفان میمن د خالي په ورځ خپل یو بیان کې ویلي چې انتظامیې پي ټي آي ته د جلسې لپاره کوم شرطونه ایښي د هغې څخه په سرغړونه د جلسې لپاره ورکړل شوې اجازت نامه منسوخ کیدای هم شي.

دپټي کمشنر ویلي د جلسې لپاره انتظامیې پي ټي آي ته یو ټایم ورکړی دی اؤ که ددغه ټایم یا وخت پابندي ونه کړل شوه نو د جلسو اؤ اجتماعاتو په اړه قانون به نافذولی شي.

د خېبر پښتونخوا په جنوبي ضلعه لکي مروت کې یو ځل بیا هدفي برید ترسره شوی چې پکې د نامعلومه وسله والو په ډزو کې یو پولیس عسکر او د هغه ورور وژل شوي دي.

دا په تېرو څلورو ورځو کې په پولیسو دریمه هدفي حمله ده، چې پکې درې پولیس عسکر او یو عام وګړی وژل شوي دي.

د لکي مروت پولیسو ویلي دي چې پېښه د خالي اؤ اتوار په منځ شپه کې په اباخیل سیمه کې رامنځته شوې.

د پولیسو په وینا د نامعلومه وسله والو په ناتاره ډزو کې د پولیس هیډ کانسټېبل حافظ صفي الله او د هغه ورور نوید الله وژل شوي دي. دواړه په پېښه کې لومړی سخت ټپیان شوي وو، خو وروسته یې په روغتون کې ساه ورکړې ده.

‎پولیس وایي، حافظ صفي الله د وزیرستان په سیمه کې د پولیسو د پلټنو څانګه کې خدمات ترسره کول او په رخصتۍ کور ته راغلی و.

د هغه ورور، نوید الله، د پښتون ژغورنې غورځنګ سیمه ییز فعال او تحریک د اباخېل سیمې رابطې کار وو.

پولیسو ویلي چې وژل شوي کسان له مونځ وروسته په موټر سایکل کور ته روان وو، چې د برید هدف وګرځېدل.

پی ټي ایم دا پېښه په سختو ټکو غندلې ده، او د غورځنګ د مرکزي کمېټۍ غړي حنیف پښتین ویلي دي چې دا یو غیر انساني عمل دی او د پښتنو پر وړاندې د ظلمونو د یوې اوږدې سلسلې برخه ده.

‎پښتین دا هم ویلي چې دپي ټي ایم مشر منظور پشتین د وژل شوو کسانو له کورنۍ سره په اړیکه کې دی، او دوي به په ګډه یو مشترکه لایحه عمل اعلان کړي.

‎ برید کوونکي له پېښې وروسته له سیمې تښتېدلي دي، او پولیسو د نامعلومه وسله والو پر ضد مقدمه درج کړې او پلټنې یې پیل کړي دي.

‎تراوسه د دې پېښې ذمه واري چا پر غاړه نه ده اخستې.

تیره ورځ هم په لکي مروت نورنګ سیمه کې د پولیسو په استخباراتي عملیاتو کې یو مهم وسله وال کمانډر ملا غلام محمد وژل شوی و.

له دغه عملیاتو وروسته په لکي مروت کې دا په پولیسو دویم برید دی، او تر دې وړاندې پرون په مستي خېل سیمه کې یو بل پولیس اهلکار هم په یو هدفي برید کې وژل شوی و.

د پاکستان پوځ په تازه خپاره کړي بيان کې ليکلي چې د بلوچستان په قلات کې د شپږم او اووم سپټمبر په منځنۍ شپه يې د پټو معلوماتو په اساس عملیات کړي او دوه تنه یي وژلي. پوځ د ياد کسانو په اړه نور معلومات ندي ورکړي.

د پوځ وياندې ادارې په خپل بيان کې دعوه کړې، ”وژل شوي کسانو په سيمه کې د امنيتي ځواکونو او د بې ګناه ملکي وګړو پر ضد په ګڼو ترهګريزو فعاليتونو کې لاس درلود“.

قلات له کوټې څخه شاوخوا يو 141 کلو ميټره لېري پرته بلوڅ ميشته سيمه ده. په ياده سيمه کې زياتره وخت د امنتي ادارو د عملياتو تر څنګ د بلوڅ ناقانونه ګرځول شويو بيلا بيلو تنظيمونو له لوري په امنيتي ادارو د وسلوالو ډليزو بريدونو، او مالي ځاني تاوانونو دعوې کېږي.

د قلات د پېښې اړوند د پوځ په بيان کې ليکل شوي چې، ” د پاکستان وسله وال ځواکونه له خپلو خلکو سره په شريکه د بلوچستان د امن، خوشحالۍ او پرمختګ بربادکولو هڅې شنډولو ته ژمن دي۔"

د پوځ په بيان کې ليکل شوي، ” د عملیاتو په ترڅ کې، ځواکونو د ترهګرو ځای په ولکه کې اخيستی او په مؤثره توګه يې ښکیل کړي او دوه ترهګر يې وژلي، له وژل شويو څخه وسلې او چاوديدونکي توکي هم ترلاسه شوي.“

د پوځ په وينا، په سيمه کې د نورو ترهګرو د له منځه وړلو په موخه د پاکۍ عمليات روان دي.

اوړمه ورځ د پاکستان د پوځ وياند لفټننټ جنرل احمد شريف چودري مطبوعاتو ته ویلي وؤ، د روان کال په تيرو اتو میاشتو کې د ترهګرۍ ضد عملياتو کې د پوځ 193 افسران او عسکر وژل شوي دي. هغه هم دعوه کړې وه چې د اخري ترهګر د ختمولو پورې به د ترهګرۍ ضد جګړه روانه وي.

تيره شپه د بلوچستان په پښتني سيمه پشين کې پوليسو د عملياتو په ترڅ کې د پينځه تنو وسلوالو د وژنې دعوه کړې وه.

د ترهګرۍ ضد پوليس"سي ټي ډي" په خپاره کړي بيان کې دعوه کړې،” وژل شوي ترهګر وو او تعلق يې له خوارج(ټي ټي پي) تحريک طالبان پاکستان سره دی.

پوليسو ويلي، د ځوابي ډزو په ترڅ کې يې ياد کسان وژلي او د هغوي نه یي وسله او چاودېدونکي توکي هم تر لاسه کړي.

سي ټي ډي پوليسو د يادې پېښې د مقدمې درج کولو او نورو پلټنو کولو خبر هم وکړی. خو له تر اوسه په دې اړه د تحريک طالبان پاکستان کوم دريځ مخې ته ندی راغلی.

یاده دي وي، د پاکستان مرکزي حکومتي کابينې پوځ او امنيتي ادارو ته په بلوچستان کې د ترهګرۍ د مخنيوي لپاره د مشکوکو خلکو نيولو او درې مياشتې له ځان سره ساتلو قانوني اختيار ورکولو پريکړه کړې ده.

خو بلوڅ او پښتانه سياستوال او د انساني حقوقو فعالان دا حکومتي پرېکړه د ملک د ایين، قانون او د انساني حقونو ضد عمل بولي او له حکومته بيرته د دې پريکړې د اخيستلو غوښتنه کوي.

د بلوچستان نېشنل ګوند مشر سردار اختر جان مېنګل څو ورځې وړاندې له همدې کبله د قومي اسمبلۍ له څوکۍ استعفی ورکړه چې وایي په پارلمان کې د بلوچستان د خلکو د حقونو په اړه نه څوک خبرې کوي او نه پرې قانون سازي کیږي خو د صوبې د وسایلو او خلکو خلاف پکې فیصلې کیږي.